Madaxweyne Siilaanyo oo la kulmay ergayga QM ee Soomaaliya
Isniin, April, 03 2017 (HOL)- Madaxweynaha Somaliland Axmed
Maxamed Siilaanyo ayaa maanta xafiiskiisa ku qaabilay wefti uu hogaaminayo
ergayga gaarka ah ee xoghayaha Qaramadda Midoobay Mr. Michael Keating oo
booqasho laba cisho ah ku yimid Somaliland.
Weftiga Mr. Michael Keating ayaa
soo indho indheeyey goobaha dadkii abaaraha lagu ururiyey ee lagu caawiyo ee miyiga
magaaladda Gabiey, waxaanu sheegay inay dadkaasi gurmad u baahan yahay,isla
markaana qaramadda midoobay dhankeeda
wixii awoodeeda ah ku caawin doonto dadkaasi abaaruhu saameeyeen.
Shirka madaxweynaha marka uu
dhamaystay waxa warbaahinta la hadlay ergayga Qaramadda Midoobay ee Soomaaliya Mr.
Michael Keating iyo wasiirka Arrimaha dibadda oo sheegay ujeedadda u yimaadeen
Somaliland.
“waxaa halkan inoogu yimid wefti uu hogaaminayo
xoghayaha gaar ah ee Qaramada Midoobay, ujeedadiisa ugu mudna waxay ahayeen inay
xog ogaal u noqdaan xaaladda abaareed ee wadanka ka jirta shalayna waxay soo
booqdeen meelaha lagu ururiyey dadkii abaaraha ee lagu xanaaneeyo, waxaanay
madaxweynaha ugu yimaadeen sidii ay u xoojin lahaayeen cilaaqaadka iyo wada
shaqaynta ka dhexeysa, qaramada midoobay iyo Somaliland, waxaanu ka wada
hadalnay arrimo la xidhiidha horumarka iyo doorashooyinka”ayuu yidhi wasiir
Sacad Shire.
Sidoo kale, waxa isaguna halkaasi
ka hadlay Ergayga Qaramadda Midoobay u qaabilsan Soomaaliya Mr. Michael Keating,
waxaanu sheegay in arrimaha uu u yimid ka mid tahay arrimaha abaaraha oo uu
sheegay in ururada ka wada shaqeeyaan
arrimaha bani’aadanimadda ka wada hadleen sidii loo caawin lahaa dadkaasi abaaruhu
saameeyeen oo uu xusay inay soo arkeen oo ay booqdeen.
“waxaanu soo aragnay dadka
abaaruhu ku dhaceen ee reer Somaliland oo u baahan gargaar iyo mucaawimo,
waxaana ka wada hadlaynay sidii dadkaasi gacan loo siin lahaa oo caruurta iyo haweenba
oo u baahan caawimo loo gargaari lahaa”ayuu yidhi Mr. Michael Keating.
Sidoo kale,waxa wax laga
waydiiyey arrimaha saldhiga militiri oo uu sheegay in wixii dhaqaalaha kor u
qaaday ama shaqo abuur keenaya loo baaahan yahay,taas oo ku dhisan nidaamka
cad, w axaanu xusay in arrintaasi u taalla Somaliland, isla markaana xeerarka caalamka waafaqsan yahay heshiishku.
“Waxaan filaya arrintani
(Saldhiga Militari) ay u taalo xukuumadda Somaliland qaabkii ula macaamili
lahayd haday jirto arrimo ay warbaahinta madaxa banaan iyo ururada rayidka
mowducan ka qabaan ay muhiim tahay in la shaaciyo oo xukumadda Somaliland
lagala hadlo, waxa muhiim ah oo cad sidii kor lagu qaadi lahaa kaabaayasha kala
duwandhaqaaalaha sida shaqo abuurka iyo abuurista fursado dhaqaalaha ay helaan
shacabka Somaliland. Laakinse, qaabka loo fulinayo ay noqoto inay cadahay iyado
lagu dabaaqayo nidaamka caalaamiga ee sharciga caalamiga ah (international
law.”ayuu yidhi Mr. Michael Keating mar uu ka jawaabayey arrinta saldhiga
Militari ee Somaliland ka kiraysay Imaaraadka Carabta.
Barkhad-ladiif M. Cumar,
Hiiraan Online
[email protected]
Hargeysa, Somaliland.