Burcad badeed Soomaali ah oo afduubatay Markab laga leeyahay dalka India
Isniin April, 03, 2017, (HOL) – Burcad badeed Soomaali ah ayaa lagu
waramayaa in ay qafaasheen Markab kuwa xamuulka qaada ah oo laga leeyahay dalka
India, waxaana soo baxaya warar kala duwan oo ku saabsan afduubka Markabka.
Sida laga soo xigtay warbaahinta dalka India afduubka Markabka
ayaa yimid xili uu marayay gacanka cadmeed, isaga oo ka soo anbabaxay magaalada
Dubai ee dalka isku taga imaaraadka Carabta
Warbaahinta ayaa intaa ku dartay in Markabka oo la qafaashay 01 bishan April
ay la socdeen 11 shaqaale ah, waxaana uu ku sii jeeday dekeda Mukala ee dalka
Yemen.
Ilaa iyo hadda ma cadda halka ay la tageen Burcada badeeda Markabka, balse waxaa
jiray shaki laga qabo in ay la soo aadeen dhinaca xeebaha
Soomaaliya.
Dhawaan ayeey aheyd markii burcad badeed Soomaali ay afduubteen Markab weyn
oo kuwa shidaalka qaada ah, kaa oo sitay calanka Srilanka, balse laga lahaa dalka Imaaraadka Carabta.
Ugu danbeyntii, afduubka burcad badeedka Soomaalida oo hoos u dhac ku yimid
sanadihii u dambeeyay, ayaa hadda u muuqda kuwo soo xoogeysanaya, taa oo shaki badan ku abuuri karta Maraakiibta isaga gooshta gacanka cadmeed.