Is rasaaseyn dad ay ku dhinteen oo ka dhacday deegaanka Dharkeyn-Geenyo gobolka Sool
Khamiis, April, 20, 2017 (HOL) - Sadex
qof ayaa la sheegayaa in ay ku dhinteen tuulada Dharkayn-geenyo oo 75Km galbeed
kaga aadan magaalada Laascaanood Xarunta gobolka Sool kadib markii rasaas ka
dhacday meel bartamaha magaaladaas ku taala.
Sadexda ruux ee dhimatay ayaa la sheegay in
ay ka tirsanaayeen ciidama Soomaaliland oo saaka gaaray Dharkayn-geenyo si ay
qayb uga noqdaan ciidamo loo qorsheeyey inay wax ka qabtaan beelo colaad aafo
badan keentay degaankaasi ka dhex taagnayd.
"Waxaan maqalay rasaas dhacday,
hadana waxaa dhacday waqti yar ka dib rasaas badan, waxaana goobtii oo ahayd
xudunta magaalada isugu yimi ciidan xoogleh, waxaana lay sheegay 3 askari in ay
dhinteen" sidaa waxaa yiri Maxamed Cali oo degaankaasi jooga waxaana uu
intaas ku daray in rasaasta bilawgeeda ay lahaayeen dad degaanka ka soo jeeda.
Ma jiro wax hadal ah oo ka soo baxay
masuuliyiinta ciidanka, waxse la sheegayaa in muran dhex maray saraakiil
ciidanka ah iyo maamulka Dharkayn ee dhinaca Itoobiya ay salka ku hayso
rasaasta dhacday,
Xaalada Degaankaas oo awle ahaa mid
colaad sokeeye aafaysey ayaa haatan waxa ka muuqda Cabsi xoogleh oo kaga
imaankarta xiisada haatan ka cusboonaatay.
Dhinaca Kale ciidanka Somaliland
ayaa gaadhay Tuulada Saaxdheer oo iyana ka mid ah degaanada colaadu ka taagnayd
lana siman Dharkayn-geenyo oo labaataneeyo Kilomitir Bari ka xigta, waxaana
Hiiraan loo xaqiijiyey in si nabad ah ay halkaas ku tageen ciidan beeleedkii
halkaasi joogeyna ay ka tageen intii aan ciidanku soo gaarin.
Seynab Cabdi Warsame, Hiiraan
Online.
[email protected].
Laascaanood, gobolka
Sool.
