Maxey tahay sababtii loo afduubtay wariye Hanad Cali Guuleed?
Axad, April, 02, 2017(HOL)-Saddex maalin ka hor
afduubkiisa ayuu nasoo booqday, waxaana uu ii sheegay in ay wadaan barnaamij
lagu caawinayo dadka abaarta iyo macluusha ay saameysay.
Soomaali badan oo aan ka mid ahay, ayaa
fakarkaasi aad ula dhacay, waxaan Allah aan uga barinay in uu ka abaalmariyo
wanaaga uu sameynaayo.
Qoyska Wariye Hanad, waxaa afduubkan ay u
sababeynayaan arrimo la xiriira howlaha gargaarka iyo Ololaha Media for Aid, ee
madaxda uu ka ahaa.
Barqanimadii sabtida, waxaa isoo gaaray war
sheegay in Hanad la afduubtay, balse si fudud kuma aan aamin, ilaa aan la
xiriiro qoyska Hanad, oo markii dambe ii xaqiijiyay.
In Magaaladda Muqdishu, la isku afduubtay ayaa
aad u adkeeyd in ay dadka aaminaan.
Mudane Guuleed, oo ka tirsan Idaacadda Goobjoog
FM, ayaa shalay laga afduubtay duleedka-galbeed ee magaaladda Muqdishu.
Waxaa la sheegay in wariyaha ay afduubteen koox
hubeysan, oo ku sugayay banaanka hore ee gurigiisa, waxaana xiligii la
afduubanayay uu usoo socday goobtiisa shaqada.
Wariye ka tirsan Goobjoog, ayaa Hiiraan Online u
xaqiijiyay afduubka wariyaha.
Hanad Cali waxaa uu soo wacay qoyskiisa waxyar
kadib, markii la afduubtay isaga oo sheegay in qol yar lagu xiray, lana jir
dilay, wixii intaa ka dambeeyayna xiriir waa la waayay.
“Afduubka Hanad Cali Guuleed waxaa ay
dhaawaceysaa damiirka warbaahinta Soomaaliyeed, waana sii socoshada dadaallada
lagu aamusinayo saxafiga ay ka go’antahay in uu runta sheego, una noqdo codka
Soomaalida aan codka laheyn”sidaasi waxaa yiri Agaasimaha guud ee Goobjoog
Media Group Xasan Maxamud Maxamed.
Wasiirka cusub ee Wasaaradda Warfaafinta dowladda
Soomaaliya Cabdiraxmaan Cumar Cusmaan ayaa cambaareeyay, waxaana uu soo
jeediyay in talaabo deg-deg ah la qaado, si bed-qabka hanad loo maqlo.
Goobjoog Media Groups waxa ay cambaareyneysaa
afuduubka Hanad Cali Guuleed, waxaaayna ka wal-walsantahay noloshiisa, ciddii
afduubatayna waxa ay ugu baaqeysaa in sidhaqso ah ku daayaan, sidaasi waxaa
lagu yiri qeyb ka mid ah warsaxaafadeed kasoo baxay idaacadda maxaliga ah ee
Goob-joog News.
Soomaaliya waa wadanka ugu badan ee lagu
dhibaateeyo, dadka ka shaqeeya warbaahinta, sida Reporters Without Borders, ay
sheegtay.
Hassan Istiila
[email protected]
Mogadishu,Somalia