Wasiirkii hore ee Dekeddaha oo xalay magaalada Muqdisho ku geeriyooday
Axad, April, 02, 2017 (HOL) Waxaa xalay alle ha u naxariisteen magaalada
Muqdisho ku geeeriyooday Nuur Faarax Xirsi oo ahaa Wasiirkii Dekedaha iyo
Gaadiidka Badda ee Xukuumaddii hore ee Cumar C/rashiid.
Wasiirka ayaa maalmahan ku xanuunsanayay magaalada Muqdisho, isagoo lagu
daweynayay Isbitaalka Erdogan Ex Digfeer, kaddib markii maskaxda dhiig kaga
furmay.
Dhaqaatiirta Isbitaalka Digfeer ayaa sheegay in xaaladiisa ay aheyd mid aad
qatar u aheyd, isla markaana aanay suura gal aheyn in dalka dibaddiisa loo
qaado.
Wasiirkii hore ee Dekedaha ayaa ka mid ahaa Wasiiradii Xukuumaddii hore
Cumar C/rashiid oo lagu waday inay xilka wareejiyaan.
Waxaa lagu wadaa in maanta lagu aaso magaalada Muqdisho, waxaa aaskiisa
ka qeyb galaya mas’uuliyiin ka tirsan dowladda.
Ugu danbeyntii, Nuur Faarax Xirsi ayaa horay u soo noqday Safiirka
Soomaaliya ee dalka Malaysia, waxaa uu ka soo jeedaa deegaanada Somaliland,
isagoo mar furtay Xisbi la magac baxay Gurmad, hase ahaatee ku guuldareystay
inuu ka mid noqdo saddexda Xisbi ee Somaliland ka jira.
C/raxmaan Diini, Hiiraan Online
[email protected]