Danjiraha Cusub ee Jabuuti u joogi doona Somalia oo Maanta Warqadihii Aqoonsiga laga Guddoomay
Khamiis, September
08, 2016 (HOL) — Wasiirka Arrimaha Dibadda Somalia, Dr. C/salaan Hadliye Cumar, ayaa maanta kaga Guddoomay Xafiiskiisa Nuqullo ka mid ah; Warqadaha Aqoonsiga Danjiranimo Safiirka Cusub ee Dowladda Jabuuti u Qaabilsan Soomaaliya, Aden Hassan
Aden.
Wasiirka Arrimaha Dibadda
iyo Dhiirigelinta Maalgashiga iyo Safiirka cusub oo kulan wada yeeshay ayaa ka
wada hadlay xoojinta xiriirka laba geesoodka iyo iskaashiga dhinacyada badan
leh ee labada dal ka dhaxeeya.
Soomaaliya iyo Jabuuti waa
laba dal oo Walaalo ah, kana dhaxeeya xiriir sal adag, ayaa lagu yiri
war-saxaafadeed kasoo baxay Wasaaradda Arrimaha Dibadda Dalka Soomaaliya.
Somalia ayaa kaalin
balaaran ku laheyd gobonnimada wadanka Djibouti, iyadoo aqoonsatay Qarannimada
iyo madax-banaanida Waddankaas, isla markii lagu dhawaaqay gobonnimada dalkaasi oo
ku beegneyd 27-kii Juun, 1977-kii, waxaana labada Dal ay u Saldhigeen xiriir
diblomaasiyadeed iyo iskaashi wadaag ah oo ku dhisan walaalnimo.
Dowladda Djibouti waxa ay
kaalin firfircoon ku leedahay dalalka ciidamada ugu deeqay howlgalka nabad
ilaalinta midowga Afrika ee Soomaaliya (AMISOM) oo hab wadaag ah kula shaqeeya
Ciidanka Xoogga dalka Soomaaliya (XDS).
Ugu dambeyn, Ciidamada Jabuuti,
ayaa waxay ka howlgalaan Degmooyin ka tirsan gobolka Hiiraan ee bartamaha dalka
Soomaaliya , waxaana dadka Soomaaliyeed ay ugu magac dareen “Hiil Walaal”.
Maxamed X. Xuseen, Hiiraan Online
[email protected]
Muqdisho, Soomaaliya