Madaafiic Khasaare geystay oo Maanta ku dhacay Agagaarka Madaxtooyada Somalia ee Muqdisho
Talaado, September
07, 2016 (HOL) — Ugu yaraan saddex qof oo rayid ah ayaa ku dhintay, toddoba
kalena way ku dhaawacmeen hoobiyeyaal maanta baqadii kusoo dhacay agagaarka Xarunta Madaxtooyada
Somalia ee Muqdisho.
Duqeymahaan ayaanay jirin cid
sheegatay mas’uuliyaddooda, sidoo kale, waxaan ka hadlin hay’adaha amniga
Dowladda, waxaana ay ku dhaceen qaarkood kaamam ay ku noolaayeen dad
barakacayaal ah iyo goobo kale oo ay Shacab ku sugnaayeen.
Goob-joogayaal ayaa sheegay
in Hoobiyeyaashaan ay ku dhaceen Iskuulka 15 May oo ku dhaw madaxtooyada iyo
xaafado kale oo ku dhaw barxadda suuqii caga-dhiig ee degmada War-dhiigley ee
Muqdisho.
“Tiro hoobiyeyaal ah ayaa
maanta kusoo dhacay xaafado ka tirsan War-dhiigleey; qaarkood waxay ku dhaceen
goobo ay Dad ku ganacsanayeen, kuwo kalena Waxay ku dhaceen Kaam ay
barakacayaan ku noolaayeen, waxaana ka dhashay khasaare kala duwan,” ayuu sheegay goob-jooge ku sugan Degmada Wardhiigley oo la hadlay Warbaahinta.
Sidoo kale, Goobjoogahan
ayaa xusay inuu arkay dhaawacyada toddoba qof iyo dhimashada saddex kale oo
carruuri ay ku jirto, waxaana duqeymahan ay kusoo beegmayaa iyadoo lagu wado in
bishan 10-keeda uu Muqdisho ka furmo Shir ay yeelanayaan Madaxda Dalalka ku
bahoobay urur-goboleedka IGAD.
Ugu dambeyn, Magaalada
Muqdisho ayaa waxaa ka socda diyaargarow xoog leh oo loogu jiro qabashada shir
Madaxeedka IGAD oo markii ugu horreysay Muqdisho ka dhacaya tan iyo markii uu
dalku galay burburka siyaasadeed.
Maxamed X. Xuseen, Hiiraan Online
[email protected]
Muqdisho, Soomaaliya
