ITOOBIYA :Dab ka kacay Xabsi lagu xiro Oromada oo dilay 23 Qof
Sawirka : Xabsiga Qalinto oo gubanaya.
Talaado, Septembar 06, 2016 (HOL)-Ugu
yaraan 23 Qof ayaa ku geeriyooday dab ka kacay xabsi mucaaradka lagu xiro oo ku
yaala gudaha Itoobiya sida laga soo xigtay war ka soo baxay dowladda maanta oo
Talaado ah ,iyadoo Addis Ababa ay wajahayso xaalad kacsanaan ah oo ka dhalatay
dibad-baxyo maalmahan ka socday dalkaas.
Dowladda ayaa sheegtay in 21 kamid ah dadkan ay dhinteen ka dib markii ay neefta ku dhagtay dabka awgiis halka laba kale la
toogtay ,iyaga oo isku dayaya in ay ka baxsdaan xabsiga ,waxaana dad
goob-joogayaal ah ay sheegeen in inta badan dadka dhintay ay ilaalada xabsiga
toogteen.
Ilaa iyo hadda lama shaacin magacyada maxaabiista
geeriyootay ,waxaan la maqlayaa rasaas mararka qaar ka dhacaysa gudaha xasbiga Qalinto oo ku yaala
duleedka magaalada Addis Ababa ,seddex maalin ka dib markii uu dabkan ka qarxay gudaha xabsigaas.
Wararka qaar
ayaa sheegaya in dhimashadan ay timid ka dib markii maxaabiista ay isku dayeen
in ay si xoog ah uga baxsadaan xabsiga ,waxaana dadka halkaa lagu xiro lagu
hayaa in kabadan seddex sano si maxkamado loo geeyo ,iyaga oo u badan
dad loo xiray arimo siyaasadeed.
Hay’adda xuquuqul Insaanka ee Human Rights Watch
ayaa sheegtay in dad ka badan 400 qof ay dowladdu toogatay tan iyo markii ay
bilowdeen dibad-baxyadan ka dhanka ah dowladda ,iyado dadka la laayay ay u
badan-yihiin kuwa ka soo jeeda qowmiyadda Oromoda.
Ugu danbayn, xasbiga Qilinto ayaa waxaa ku xiran 300
oo qof oo ay ku jiraan siyaasiyiin iyo waliba wariyayaal siyaabo kala duwan wax
uga qoray xaaladda Itoobiya,waxaana lagu soo waramayaa in xaalad nolol xumo oo
daran ay xabsigaasi ka jirto.
Faysal M. Hassan
[email protected]
