SAWIRO: Waxgarad iyo xildhibaano ka digay in la Musuq-maasuqo Dhismaha Maamulka Hiiraan iyo Sh. Dhexe
Sabti, September 10, 2016 (HOL) —
Wax-garad ay hor-kacayaan Imaam Maxamed Yuusuf Cali iyo Ugaas Maxamuud Cali Ugaas
C/lle, ayna ka mid ahaayeen; xildhibaano ka tirsan Baarlamaanka Federaalka oo
kasoo kala jeeda Hiiraan iyo Shabeellada Dhexe, ayaa maanta ka digay in qaab gacan-taag ah lagu dhiso maamulka labadan gobol.
Shir jaraa’id oo ay Xubnahaan
ku qabteen maanta Muqdisho, ka hor intaysan Waxgaradku u dhuulin degmada Jowhar, ayaa xusay inay
soo gaareen Warar sheegaya in la qorsheeyay in ergooyin ay soo dooranayaan mas'uuliyiinta Maamulka Hiiraan iyo Shabeellada Dhexe ugu sarreeya, ayna uga digayaan Ururka IGAD inuu fara-geliyo maamulka gobolladan loo dhisayo.
“Maalmahan waxaa nasoo
gaarayay warar sheegaya in maamulka Hiiraan iyo Shabeellada Dhexe loo dhisayo la doonayo in ergooyin ay soo doortaan mas’uuliyiinta ugu sarreeya, waana ka
digaynaa tallaabadaas in la qaado, shacabka labada gobolna marna ma aqbali doonaan arrintaas iyo wixii la mid ah,” ayay
yiraahdeen waxgaradkii goobta ka hadlay.
Sidoo kale, Imaam Maxamed Yuusuf Cali ayaa shirkan jaraa’id ka sheegay inay ka digayaan qorshahaas, loona
baahan yahay in maamulka la dhisayo la siiyo fursad la mid ah middii la siiyay
maamulka Galmudug, si ay mas’uuliyiinta maamulkaas u soo doortaan xildhibaanada
baarlamaanka uu maamulkaas yeelanayo.
“Waxaan ka digaynaa qorshaha
uu ururka IGAD wado waxaana ku baaqaynaa in loo madax-banneeyo shacabka labada
gobol sidii ay mas’uuliyiinta hoggaamin lahaa ay u soo doortaan iyaga, taasoo
la mid ah Qaabkii loo dhisayo maamulka Galmudug,” ayuu yiri Sirka Jaraa'id ka sheegay Imaam Maxamed Yuusuf Cali.
Shirka jaraa’id ayay waxgaradkani
ka sheegeen in odayaasha-dhaqanka Gobolka Hiiraan ay isku yimaadaan, ayna wax
qaybsadaan, iyagoo intaa ku daray in loo baahan yahay shacabka loo ogolaado
dib u heshiisiin iyo inay arrimahoodu u madax-banaanaadaan.
Dhanka kale, Xildhibaannadii
aiyday hadalka Wax-garadka ee iyaguna Shirkaan jaraa’id ka hadlay - ayaa Waxaa ka mid ahaa; C/qaadir Cosoble, Maxamed Abuukar
Isloow (Ducaale), Maxamed Max'uud Ibraahim Goodir, Bashiir Caddoow Dheere, Maxamed
Shiiraar, Daahir Amiin Jeesoow, Xasan Macallin,
Qaasim Furdug iyo kuwo kale, ayaa iyaguna ku baaqay in qorshaha IGAD ee
dhismaha maamulka gobolladan uu yahay mid iska Hor-keenaya Dadka, waxaana
halkan ka caddeynaynaa in laga digtoonaado.
Ugu dambeyntii, Waxgaradkaan
ayaa maanta Jowhar gaaray, waxaana hadalkooda uu kusoo Beegmayaa Xilli ay Qaar ka mid ah Duubabka-dhaqanka
gobolka Hiiraan ay Qorshaha lagu dhsayo maamulkaas kasoo horjeesteen.
Maxamed X. Xuseen, Hiiraan Online
[email protected]
Muqdisho, Soomaaliya