Diyaarad sidday 81 ruux oo ay ka mid ahaayeen cayaartooy reer Brazil ah oo bur burtay
Talaado, November, 29. 2016 (HOL) --Warar soo baxaya ayaa sheegaya in
diyaarad sidday 81 ruux oo ay ku jiraan koox ka dhisan dalka Brazil
ku bur burtay magaalada Medellin ee dalka Colombia, halkaasi oo ay
ku wajahnaayeen.
Saraakiisha booliiska dalka Colombia ayaa sheegay in shan ruux ay ka badbaadeen
shilkaasi diyaaradeed, halka 76 kalana ay dhinteen.
Diyaarada oo ka duushay dalka Brazil ayaa waxaa la socday kooxda
kubbada cagta ee Chapecoense oo ka dhisan horyaalka heerka koowaad ee
dalka Brazil.
Kooxda ayaa u socotay ka qeyb galka ciyaar kama dambeys aheyd oo ka tirsan
Copa Sudamericana, iyaga oo la cayaari lahaa koox ka dhisan
magaaladda Medellin ee Atletico Nacional.
Qorshaha waxaa uu ahaa in is araga koowaad ee cayaarta la qabto maalinta beri oo Arbacada ah, laakiin hadda hakad ayaa ciyaarta
la geliyay.
Sidoo kale dadka shilka diyaariyeed ku dhintay waxaa ka mid ahaa ciyaaryahano, wariyaal , madax iyo dadkii kale ee la socotay kooxda.
Alan Ruschel, iyo labo goolhayeyaal oo lagu kala magacaabo Jackson
Follman iyo Marcos Danilo ayaa loo badinayaa in ay ka mid ahaayeen dadkii
shilka ka badbaaday.
Ugu danbeyntii, roobab xoogan oo magaalada ka da’ayay ayaa loo malaynayaa in ay
sababeen shilka diyaarada, wallow aan ilaa iyo hadda la cadeyn waxa
shilka dhaliyay.
C/raxmaan Diini, Hiiraan Online
[email protected]
Beledweyne, Soomaaliya
