Axad, July 31, 2016 (HOL) — Ciidanka Dowladda Somalia iyo kuwa Itoobiya ee AMISOM ayaa dib ula wareegay Deegaanka Garas-weyne ee Gobolka Bakool, kaddib Al-shabaab ay Toddobaadkii hore qabsatay.
Guddoomiyaha Degmada Xudur ee Gobolka Bakool, Maxamed Macallin, ayaa sheegay in hawl-gallo ay ka sameeyeen Deegaanka Garasweyne ay ku dileen sarkaal sare oo ka tirsanaa Al-Shabaab oo aanu magaciisa sheegin.
Sidoo kale, Maxamed Macallin wuxuu xusay in dagaalkan uu ahaa mid culus, isla markaana ciidanka Maamulka Koonfur-galbeed iyo kuwa AMISOM ay jabiyeen xoogaggii Al-shabaab ee deegaankaan ku sugnaa.
Macallin oo sii hadlayay ayaa xusay in hawl-gallo laga sameeyay deegaanno kala duwan oo ka tirsan Bakool in Al-shabaab ay ku haysay dhibaatooyin, balse qaarkood laga fara-maroojiyay kuwo kalena ay socdana sidii looga saari lahaa.
Dhanka kale, deegaanka Garasweyne oo Qiyaastii 50-KM u jira Degmada Xudur ee Gobolka Bakool ayaa waxaa saldhig u ahayd ciidamada Itoobiya ee ka tirsan AMISOM, kuwaasoo todobaadkii hore ka baxay, Al-shabaab ayaana gudaha u gashay.
Ugu dambeyn, Ciidamada Itoobiya ayaa maalmihii la soo dhaafay banneeyay tiro fariisimo ah oo ay ku lahaayeen gobolka Bakool, kuwaasoo markiiba ay la wareegtay Al-shbaaab.
Maxamed X.Xuseen, Hiiraan Online