Hiiraan Online

Isniin, Juun 29, 2015 (HOL) —Dagaalyahanno ka tirsan xoogagga Al-shabaab ayaa xalay saqdii dhexe weerar qorsheeysan ku qaaday saldhig ay ciidamada maamulka Jubbaland ku lahaayeen halka loo yaqaan Akadeemi oo dhowr km u jirta magaalada Kismaayo islamarkaana kaga beegan dhanka waqooyi.

Dagaal xooggan oo la isku adeegsaday hubka noocyadiisa kala duwan ayaa labada dhinac ku dhexmaray halka loo yaqaan Akadeemi, waxaana dagaalkaasi uu sababay qasaarooyin isugu jira dhimasho iyo dhaawac oo kala gaaray labada ciidan.

Ma jiraan warar xog-ogaal ah oo qeexaya qasaaraha rasmiga ah ee ka dhashay dagaalka haseyeeshee masuuliyiin u kala hadashay labada dhinac ayaa guulo ka sheegtay dagaalkaasi, mana jiraan warar ka madax bannaan dhinacyadaasi oo faahfaahinaya khasaaraha uu sababay dagaalkaasi.

Tan iyo intii lagudo galay bishan barakeeysan ee Ramadaan waxaa isa soo tarayay weerarrada ay xarakada Al-shabaab ka geeysaneeyso gudaha dalka Soomaaliya, iyadoo goobihii ugu danbeeyay ee ay weerarr ka fuliyaan ee gobollada Jubooyinka ay kamid yihiin deegaanada Dhoobleey, Waladeyn iyo weliba degmada Kismaayo oo weerarkii labaad ay xalay ka geeysteen.

Xasan Nuur, Hiiraan Online
[email protected]
Kismaayo-Soomaaliya