Ra’iisul Wasaaraha Soomaaliya oo Hambalyo ku Aaddan 26 Juun u diray Shacabka Soomaaliyeed
Jimco, Juun 26, 2015 (HOL) — Ra’iisul Wasaaraha Xukuumadda FS Cumar C/rashiid Cali Sharmarka ayaa hambaylo ku aaddan 26, Juun oo ahayd maalintii ugu horreysay oo calan Soomaaliyeed laga taago ciida Somalia u diraya dhammaan Shacabka Soomaaliyeed meel kasta oo ay joogaan, isagoo si gooni ah ugu hambalyeeynayaa ciidamada qalabka sida, kuwaasoo u taagan ilaalinta xoriyadda iyo difaaca dalkooda.
Maanta oo kale 26-ka Juun sanad kasta waxaa loo dabaal-daga maalintaan qiimaha badan ee xoriyadda, waxaana shacabka Soomaaliyeed ku soo dhaweeyaan farxada iyo damaashaadyo loo sameeyo maalinta xoriyada, waa maalin xasuus mudan, waana maalintii ay gobolad Waqooyi xoriyadda ka qaateen gumaystihii Ingiriiska.
“Waxaan Maanta Qirayaa in halgankii loogu jiray xornimadda mudo sanado ah in ay ku nafwaayeen iyagoon hananin xoriyadda dhalin yaro badan oo u istaagtay xoriyadda oo qayb ka ahaa ururadii gobonimo doonka, muwaadiniin kale ayaa u huray maalkooda iyo naftooda in ay uga qayb qaataan raadinta xoriyadda oo maanta ah geedka aan harsanayno, qaar kale ayaa xili dheer noloshooda ku qaatay xabsiyo ay dhigeen gumaystihii dalka haystay, maanta waxaa qadarin mudan inaan u ducayno dhamaan kuwii xornimadaan keenay oo isugu jiray Rag iyo Dumar Soomaaliyeed oo ka dhiidhiyey dhibaatooyinka gumaystuhu ku hayay,” ayuu yiri RW Sharma’arke.
Isagoo sii hadlaya ayuu intaas ku daray. “Maanta dalkeenu wuxuu u baahan yahay in mar labaad u istaagno sidii aan uga dulqaadi lahayn nabadiidka muwaadiniinta aysan u suurtoobayn caawo oo kale iney u dabaal dagaan maalintaan qiimaha badan, Waana inaan maskaxda iyo qalbiga ku haynaa geesiyaashii u dagaalamay in Soomaaliya ay noqoto wadan xor ah. Waxaa sidoo kale na looga baahan yahay inaan diirada saarnaa sidii shacabka Soomaaliyeed laysugu soo dhaweyn lahaa iyadoo loo marayo is faham cidii wax kala tabanaysa” ayuu yiri RW Cumar.
Ugu dambeyn, Sharma’arke yaa sheegay in horumar laga sameeyey dhanka siyaasadda, Amniga, Dhaqaalaha, Dhisida maamul goboleedyada iyo hada oo xukuumaddu ku howlan tahay yagleelida ciidan qaran oo uu dalku yeesho, waxaa sidoo kale RW sheegay in xukuumadiisa ay u qorshaysan tahay ka dhabaynta higsiga 2016, taas oo Soomaaliya lagu gaarsiinayo doorashooyin xorr ah oo xalaal ah iney ka dhacaan.
Maxamed X. Xuseen, Hiiraan Online
[email protected]
Muqdisho, Soomaaliya
