Beesha Caalamka oo si Adag ah u Cambaareysay Weeraradii Hoteelka Central
Sabti, Feberaayo 21, 2015 (HOL) — Golaha Ammaanka
ee QM ayaa si kulul u cambaareeyay weerarkii Hotel Central lagu qaaday shalay, kaasoo
ay ku naf-waayeen 25-qof oo ay ku jiraan laba xildhibaan oo baarlamaanka DFS ka
tirsan.
War-saxaafadeed kasoo baxay Golaha Ammaanka ee QM
ayaa lagu sheegay in weerarkaas uu ahaa mid argagixiso, isla markaana aanu hor-istaagi
karin horumarrada la gaaray iyo is-garab-taagga Soomaaliya.
Xoghayaha guud ee QM, Ban Ki-Moon ayaa isna weerarkan
ku tilmaamay mid bahalnimo ah, iyadoo dad cibaadeysanaya la qarxinayo, wuxuuna
intaas ku daray inay sii wadi doonaan taageerada ay siinayaan dowladda Somalia iyo
shacabkeeda.
Sidoo kale, weerarkan waxaa cambaareeyay Midowga
Yurub iyo Mareykanka iyagoo sheegay in dowladda Somalia ay ka taageerayaan
xaqiijinta amniga hay’adaha dowladda, waxayna tilmaameen inuu weerarkan yahay midkii
ugu khasaaraha badnaa ee muddooyinkan dhaca.
Afhayeennadda u hadashay wasaarada arrimaha dibadda
Mareykanka, Jen Psaki ayaa xustay in weerarkan uu muujinayo in Al-shabaab u
taagan tahay bur-burinta Soomaaliya.
Jen Psaki waxay intaas ku dartay in laga
guuleysan doono Al-shabaab, ayna dowladda Mareykanka ka taageerayaan dowladda
Soomaaliya la dagaalanka argagixisada.
Weerarkii shalay lagu qaaday Hotel Central ayaa
ahaa kii ugu khasaaraha badnaa ee sannadihii u dambeeya ka dhaca Muqdisho,
waxaana dadkii ku dhintay ka mid ahaa xubno ka tirsan dowladda Somalia.
Maxamed X. Xuseen, Hiiraan Online
[email protected]
Muqdisho, Soomaaliya