C/WELI GAAS: Al-shabaab dhaqan Islaam ma lahan ee waa in lala dagaalamo
Sabti, Feberaayo 21, 2015 (HOL) — Madaxweynaha
Puntland, C/wali Maxamed Cali (Gaas) ayaa si kulul u cambaareeyay weerarkii Hotel
Central lagu qaaday shalay, iyadoo ay ku dhinteen 25-qo, afartan kalena ay
kasoo gaareen dhaawacyo kala duwan.
C/wali Gaas ayaa ku tilmaamay weerarkaas mid
argagixiso, isla markaana uu cadeynayo dabeecada runta ah ee Al-shabaab ay
leedahay, wuxuuna ku daray intaas in weerarkaas uu ahaa mid xanuun badan.
“Iyadoo ay tahay maalin Jimce ah dad islaam ah oo
tukanayay oo weliba masaajid kasoo baxay inay laayaan waxay ka turjumaysaa sida
ay uga fog yihiin islaanimada,” ayuu yiri Gaas.
Sidoo kale, madaxweynaha Puntland wuxuu
hadalkiisa ku daray in kooxda Al-shabaab ay xalaaleysatay dhigga muslimiinta, uuna
dhaqankaas yahay mid fool xun.
“Falkaas wuxuu muujinayaa inaysan dad islaam ah
ahayn; waxay sidoo kale muujinaysaa inay banaan tahay in lagu jihaado meel
kasta oo ay joogaanna lagula dagaallamo lana laayo. Sababtoo ah ajande Soomaaliyeed
ma lahan, mid Islaamna ma lahan,” ayuu mar kale yiri Gaas.
Gaba-gabadii madaxweynaha Puntland wuxuu hadalkiisa
ku sheegay inuu u tacsiyeynayo dhammaan dadkii weerarkaas ku dhintay, isagoo ku
baaqay in meel looga soo wada-jeesto Al-shabaab.
Si kastaba ha ahaatee, weerarkaas ayaa waxaa
sheegatay Al-shabaab, iyadoo xustay inuu ahaa mid ay la beegsadeen xubno ka
tirsan dowladda Soomaaliya oo ku shirsanaa Hotel Central.
Maxamed X. Xuseen, Hiiraan Online
[email protected]
Muqdisho, Soomaaliya