Hiiraan Online

Isniin, Ogoosto 11, 2014 (HOL) —Munaasabad ka dhacday xarunta madaxtooyada Puntland ee magaalada Garoowe, ayaa waxaa xilalka kula kala wareegay taliyihi hore ee ciidanka madaxtooyada Cumar Cabdulaahi Maxamed Faroole iyo taliyaha cusub ee dhowaan xilkaas looso magacaabay Cabdirashiid Maxamuud Ashkir(Qodhob).

Xafladda oo ahayd mid si weyn loosoo agaasimay, waxaa kasoo qayb galay mas'uuliyiin ka tirsan saraakiisha ciidamada qalabka sida ee Puntland iyo qaar kamid ah agaasimeyaasha madaxtooyada.

Taliyaha xilka wareejiyey  Cumar Cabdulaahi Maxamed Faroole,  ayaa sheegay inuu si aad ah ugu faraxsan yahay in uu xilka wareejiyo, isagoo ballan qaaday inuu si wanaagsan ula shaqeyn doono taliyaha cusub.

Taliyaha cusub  Cabdirashiid Maxamuud Ashkir(Qodhob) ayaa isna ku ammaanay taliyihii hore qaabka hufan ee uu xilka ugu wareejiyey, wuxuuna ballan qaaday inuu la imaan doono shaqo hufan dadaal iyo karti dheeri ahna uu muujin doono.

Labada mas'uul ayaa gaba gabadii la kala wareegey dukumiintiyo ay ku qoran yihiin macluumaad la xiriira ciidanka madaxtooyada Puntland oo iyagu kamid ah kuwo ugu tababarka iyo qalabka fiican ciidamada qalabka sida ee Puntland.

BIshan Agoosto shanteedii ayey ahayd markii digreeto kasoo baxday xafiiska madaxweynaha  xilka looga qaaday Gaashaanle Sare Cumar Cabdulaahi Maxamed Faroole oo ahaa taliyaha ciidanka madaxtooyada iyadoo xilkaas uu Madaxweyne Gaas usoo magacaabay taliyaha maanta lagu wareejiyey oo lagu magacaabo Cabdirashiid Maxamuud Ashkir(Qodhob).

Maxamed Salaad Xaaji Dirir, Hiiraan Online
[email protected]
Puntland, Soomaaliya