3/28/2024
Today from Hiiraan Online:  _
Wararka Maanta- Jimco, May 11, 2012
Dad careysan oo la dagaalamay ciidamada Dowladda oo doonayay inay burburiyaan goobo ganacsi oo sharci-darro ah

Jimco, May 11, 2012 (HOL) — Kooxo hubeysan ayaa dagaal kala hortagay ciidammo ka tirsan kuwa dowladda KMG ah oo saakay isku dayay inay fujiyaan goobo ganacsi oo laga dhistay hareeraha isgoyska Banaadir ee magaalada Muqdisho, iyadoo taasi ay keentay in isgoyskaas uu xirmo.

Ciidamadii dowladda ee isgoyskaas u tagay inay fujiyaan goobaha ganacsi ayaa isaga soo baxay halkaas kaddib markii rasaas xoog badan lagu furay, taasoo aan jirin wax khasaare ah oo ay dhalisay.

"Isgoyska oo dhan waxaa ku sugan dadweyne ka careysan burburinta ay ciidamadu doonayeen inay burburiyaan goobaha ganacsi ee isgoyska banaadir ku yaala, sidoo kale waxaa lagu gubayaa shaagagga gaadiidka," ayuu yiri goobjooge ku sugan isgoyska Banaadir.

Goobjoogaha ayaa intaas ku daray in gaadiidka dadweynuhu ay marayaan xaafadaha ku dhow isgoyskaas, iyadoo uu istaagay howlgalkii lagu doonayay in lagu fujiyo goobaha ganacsi.

Howgalkan ayaa wuxuu daba-socday howlgallo ay cidamada dowladda KMG ah iyo kuwa AMISOM ay shalay ku burburiyeen goobo ganacsi oo ku hareeraha isgoyska Zope iyo meelo ku dhow isgoyska Banaadir ayna sidoo kale ka saareen shacab ku noolaa dhismayaal wasaaradeed oo halkaas ku yaalla.

Isgoyska Banaadir ayaa waxaa mara jidadka taga Isbitaalka Banaadir iyo isbitaalka Madiina ee magaalada Muqdisho, kuwaasoo lagu daweeyo dadka qaba xanuunnada kala duwan iyo dadka ku dhaawacma shilalka iyo dagaallada ka dhaca Muqdisho.

Dowladda KMG ah ayaan ka hadlin is-hortaagga ay dadweynaha careysan saakay ku sameeyeen howlgalladii ay ciidamadu ku burburinayeen goobaha ganacsi iyadoo xaaladdu ay tahay mid aad u kacsan.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
5/11/2012 1:59 PM EST
Jimco, May 11, 2012(HOL): Ra’iisul Wasaaraha Soomaaliya Dr.Cabdiweli Maxamed Cali Gaas ayaa maanta kulan la qaatay Saraakiil ka tirsan Qaramada Midoobey, iyadoona kulanka looga hadlayay heshiis is-afgarad ah (MOU) oo ay kala saxiixdeen dowladda Soomaaliya iyo hay’adda u qaabilsan Qaramada Midoobey Xuquuqul Insaanka.

5/11/2012 8:28 AM EST
Jimco, May 11, 2012(HOL): Jaaliyadda Somaliland ee magaalada Malmö ee dalka Sweden ayaa maanta la gudoonsiiyey shahaado uu bixiyo aqalka Boqortooyada ee dalkan Sweden. Shahaadadan oo ah markii ugu horeysay ee Taariikhda dalkan Sweden ay ku guuleystaan dad Soomaali ah ayaa waxaa maanta (shalay) guddoonsiiyey Badhasaabka gobolka Skåne Mr: Göran Tunhammar iyadoo ay halkaas goob joog ka ahaayeen madaxada Gobolkan & Madaxda Jaaliyadda Somaliland ee Magaalada Malmö ee dalkan Sweden.

5/11/2012 4:22 AM EST
Jimco, May 11, 2012 (HOL) — Sarkaal ka tirsan ciidamada DKMG ah ayaa ku dhintay dagaal ciidammo kawada tirsan dowladd KMG ah ku dhexmarya xaafadda Suuq-Bacaad ee degmada Yaaqshiid, iyadoo guddoomiyaha degmada Huriwaa uu eedeyn u jeediyay ciidamada dowladda KMG ah iyo kuwa AMISOM.

5/11/2012 4:05 AM EST
Jimco, May 11, 2012 (HOL) — Guddiga xawaaladleyda Soomaalida gobolka Minnesota ee Mareykanka ayaa aad uga carooday bankiga US Bank oo sheegay inuusan diyaar u ahayn inuu la shaqeeyo xawaaladleyda Soomaalida, kaddib wada-xaajood muddo socday oo bankigaas uu kula jiray guddiga xawaaladleyda Soomaalida.

5/11/2012 3:52 AM EST
Jimco, May 11, 2012 (HOL) — Guddoomiyihii baarlamaanka Soomaaliya xildhibaan Sheekh Aadan Maxamed Nuur (Sheekh Aadan Madoobe) oo ku sugan degmada Xudur ayaa sheegay inay baaritaan ku sameynayaan dad shacab ah oo lagu dilay deegaan ku dhow degmada Xudur.

5/11/2012 3:41 AM EST
Jimco, May 11, 2012 (HOL) — Guddoomiyaha majmaca culumada Soomaaliyeed, Sheekh Axmed Dhicisow ayaa sheegay inay dib u dhigeen qabashada mudaaharaad ay ku wadeen inay maanta ka dhigaan Muqdisho, kasaoo ay uga soo horjeedaan dastuurka cusub ee Soomaaliya.

5/11/2012 3:35 AM EST
Jimco, May 11, 2012 (HOL) — Kooxo bastoolado ku hubeysan ayaa toogasho ku dilay laba qof, kuwaasoo warar kala duwan ay kasoo baxayaan, waxaana kooxihii dilka geystay u suurogashay inay ka baxsadeen goobtii ay dilka ka geysteen.