Talaado, Luulyo 7, 2026 (HOL) - Dowladda Sacuudi Carabiya ayaa mar kale xaqiijisay taageerada ay u hayso madax-bannaanida, midnimada iyo wadajirka dhuleed ee Soomaaliya, kadib wada hadal dhanka taleefanka ah oo dhex maray Wasiirka Arrimaha Dibadda ee Sacuudiga, Amiir Faisal bin Farhan, iyo Wasiirka Arrimaha Dibadda Soomaaliya, Cabdisalaan Cabdi Cali.
Sida ay baahisay Wakaaladda Wararka Sacuudiga (SPA), labada wasiir waxay adkeeyeen in Soomaaliya ay leedahay madax-bannaani buuxda oo ku saabsan dhammaan dhulkeeda, iyagoo si cad u diiday tallaabo kasta oo wax u dhimi karta amniga, xasilloonida iyo midnimada dalka.
Intii uu socday wada hadalka, labada dhinac waxay dib u eegis ku sameeyeen xiriirka labada dal, waxayna muujiyeen sida ay uga go'an tahay in la sii xoojiyo iskaashiga u dhexeeya Soomaaliya iyo Sacuudi Carabiya ee dhinacyada ay wadaagaan danaha.
Labada wasiir waxay sidoo kale carrabka ku adkeeyeen muhiimadda ay leedahay ilaalinta amniga marin-biyoodka caalamiga ah iyo xaqiijinta xorriyadda maraakiibtu ugu kala gooshi karaan, iyagoo sheegay in amniga badda uu laf-dhabar u yahay xasilloonida gobolka iyo ganacsiga caalamiga ah.
Sacuudi Carabiya ayaa sanadihii u dambeeyay kordhisay doorkeeda diblomaasiyadeed ee gobolka, iyadoo taageertay dadaallo lagu xoojinayo wada-hadalka, iskaashiga iyo nabadda, gaar ahaan dalalka ku teedsan Badda Cas iyo Geeska Afrika.
