Talaado, Luulyo, 2, 2024 (HOL) - Hantidhowrka guud ee Qaranka Soomaaliya Axmed Ciise Guutaale ayaa shir jaraa'id oo uu maanta ku qabtay magaalada Muqdisho kaga hadlay baaris ay ku sameeyeen laba xafiis oo ka mid ah hay'adaha dowladda Fedaraalka Soomaaliya.
Guutaale ayaa sheegay in baaris fatash ah oo lagu sameeyay xafiisyada ruqsada shaqada shaqaalaha shisheeyaha ee wasaaradda shaqada, arrimaha bulshada iyo adeegga kordhinta dal ku jooga shisheeyaha ee hay’adda socdaalka iyo jinsiyadda, lagu ogaaday iney ku kaceen falal musuq maasuq ah iyo wax is daba marin.
Wuxuu tilmaamay Hantidhowrka Qaranka in xafiisyadaan ay ku maqan tahay ku dhawaad 21 Milyan oo doolarka Mareykanka ah oo aan lagu shubin qasnada dowladda intii u dhexeysay sideedii Maarso ee 2018-kii, ilaa 19-kii April ee sanadkii lasoo dhaafay ee 2023-kii.
“Lacagta dakhliga ah oo ay qabteen xafiisyada ruqsadda shaqada iyo shaqaalaha shisheeyaha ee wasaaradda shaqada iyo arrimaha bulshada iyo adeegga kordhinta dal ku jooga shisheeyaha ee hay’adda socdaalka jinsiyadda intii u dhexeysay sideeddii Maarso 2018 ilaa 19-kii Apriil 2023, waxay ahayd lacag dhan $33,370,260, hayeeshee $12,437,690 kaliya lagu shubay qasnada dowlada, kana mid ah dakhliga guud ee ay xafiisyadaasi qabteen intii u dhexeysay sideeddii Maarso 2018, illaa 19-koo April 2023 oo ah muddo 5 sano iyo dheeraad ah waxay u xareeyeen dowlada, iyaga oo marsiiyay nidaamka SFMIS-ka” ayuu yiri Hantidhowraha guud ee Qaranka Guutaale.
Hantidhowraha guud ee Qaranka Soomaaliya Axmed Ciise Guutaale ayaa sidoo kale sheegay in lunsashada lacagtaan ay saameyn weyn ku yeelatay dowladda dhexe oo uu tilmaamay in xitaa ay deyn u gashay sidii ay u bixin laheyd mushaaraadka shaqaalaha dowladda, ciidamada iyo Xildhibaannada.