5/28/2020
Today from Hiiraan Online:  _
Wararka Maanta- Axad, May 17, 2020
Soomaaliya oo qorsheyneysa in ay dib usoo celiso muwaadiniinteeda Caalamka ku xayiran


 

Axad, May 17, 2020 (HOL) - Ra’iisul wasaaraha Soomaaliya Xasan Cali Kheyre oo kulan la qaatay guddiga ka hortagga iyo xakameynta xanuunka Coronavirus ayaa waxa uu sheegay in dowladdu ay dooneyso in ay dib usoo celiso dadka Soomaaliyeed ee ku xayirmay meelo badan oo caalamka ah. Iyadoo la dhowrayo caafimaadka dadkaasi.

“Waxaan u mari doonnaa nidaamyada caalamiga ah in dadkaasi dalka lagusoo celiyo, iyadoo la ilaalinayo bad-qabookoda” ayuu Xasan Cali Kheyre u sheegay guddiga.

Soomaali badan ayaa ku xayiran meelo kala duwan oo caalamka ah, waxaana kamid ah dalka Iiraan oo ay muddo seddex bilood ah ku go’doonsanyihiin 13 muwaadin oo Soomaaliyeed kuwaas oo 11 kamid ah ay yihiin maxaabiis waddankaasi lagasoo daayay, halka qof kamid ah dadkaasi uu yahay aqoonyahan dhameystay jaamacad uu Iiraan ka dhiganayay iyo Danjire Maxamed Xuseen Awliyo oo ka shaqeynayay sidii maxaabiistaas Soomaaliya loogusoo celin lahaa.

“ Waa hadal wanaagsan haddii dowladdu ay dooneyso in ay dib usoo celiso muwaadiniinta go’doonsan ee raba in ay dib ugusoo laabtaan dalkooda, waxaana ku boorrin lahaa in Il gaar ah loo yeesho dadkaan ku xayiran Iiraan” ayuu u sheegay HOL Maxamed Xuseen Awliyo.

Inkastoo muwaadiniintaasi Soomaaliyeed ay ku xayiranyihiin Iiraan, haddana xukuumadaha Muqdisho iyo Tehran kama dhexeeyo calaaqaad diblumaasiyadeed.

Tan iyo wixii ka dembeeyay markii uu aad dunida ugu baahay xanuunka COVID-19, waxaa la xeray inta badan dalalka adduunka, taasina waxay sababtay in muwaadiniin badan oo Soomaaliyeed ay ku xayirmaan meelo kamid ah caalamka.

Hadalka ra’iisul wasaare Xasan Cali Khyere ayaase noqonaya mid dad badan oo Soomaaliyeed oo meelo kala duwan ku xayirnaa rajo galinaya, balse waxaa la eegayaa sida loo fuliyo iyo goorta la dhaqan-geliyaba.

Abdiaziz Ahmed Barrow, Hiiraan Online
[email protected]









Click here
5/17/2020 4:55 PM EST
Axad, May 17, 2020 (HOL) - Wasiirka wasaaradda caafimaadka iyo daryeelka bulshada ee dowladda Soomaaliya Dr. Fowsiya Abiikar Nuur ayaa waxay ka hadashay xaaladahii ugu dembeeyay ee xanuunka COVID-19 ee dalka, waxayna sheegtay in maanta la xaqiijiyay 64 xaalad oo cusub , kuwaas oo laga helay meelo kala duwan.

5/17/2020 3:30 PM EST
Axad, May 17, 2020 (HOL) - Wasiirka wasaaradda warfaafinta Soomaaliya Maxamed Cabdi Xayir Maareeye ayaa ka hadlay qaraxii duhurnimadii maanta ka dhacay magaalada Gaalkacyo ee xarunta gobolka Mudug ee lagu dilay guddoomiyahii gobolkaasi ee dhinaca Puntland Axmed Muuse Nuur.

5/17/2020 3:03 PM EST
Axad, May 17, 2020 (HOL) - Madaxda sare ee waddanka Nigeria ayaa waxay sheegeen in haweeney la xanuunsaneyd COVID-19 ay umushay cunug caafimaad qaba, kadib markii ay foolatay iyadoo ku jirta qol lagula tacaalayay caafimaadkeeda.

5/17/2020 8:58 AM EST
Axad, May 17, 2020 (HOL) - Madaxweynaha Puntland Siciid Cabdullaahi Deni ayaa si kulal u cambaareeyay dilkii loo geystay guddoomiyihii gobolka Mudug Axmed Muuse Nuur, oo maanta lagu qaarajiyay weerar ismiidaamin ah oo lagula eegtay magaalada Gaalkacyo.

5/17/2020 8:32 AM EST
Axad, May 17, 2020 (HOL) - Waxaa maanta cod aqbaliyad ah lagu ansaxiyay golahii wasiirada uu dhowaan soo magacaabay madaxweynaha Galmudug Axmed Cabdi Kaariye “Qoorqoor”, kaaso oo qudhiisa joogay fadhiga Baarlamanku ay yeesheen.

5/17/2020 8:01 AM EST
Axad, May 17, 2020 (HOL) - Ugaas Xasan ugaas Khaliif oo kamid duubabka gobolka Hiiraan ayaa maanta kormeeray xaaladaha magaalada Beledweyne, waxaana uu sheegay in biyuhu aay geeysteen qasaaro badan.

5/17/2020 7:32 AM EST
Axad, May 17, 2020 (HOL) - War qoraal ah oo kasoo baxay AMISOM ayaa waxay ku sheegteen in ay guulo ka gaareen dagaal dhex-maray ciidamadooda iyo kuwa Al-shabaab , kaas oo ka dhacay halka lagu magacaabo Bilis Qooqaani oo ka tirsan gobolka Jubbada hoose ee maamulka Jubaland.

5/17/2020 6:04 AM EST
Axad, May 17, 2020 (HOL) - Guddoomiyihii gobolka Mudug, Axmed Muuse Nuur iyo qaar kamid ah ilaaladiisii ayaa ku geeriyooday qarax ismiidaamin ah oo goor dhowayd ka dhacay magaalada Gaalkacyo ee xarunta gobolka mudug.

5/17/2020 1:49 AM EST
Axad, May 17, 2020 (HOL) - Xeer ilaaliyaha guud Soomaaliya, Dr. Suleymaan Maxamed Maxamuud ayaa sheegay in ay hayaan cadeymo ka dhan ah saraakiil katirsan wasaaradda caafimaadka Soomaaliya oo lagu hayo musuqmaasuq dhowaana maxkamad la geyn doono.

5/17/2020 1:24 AM EST
Axad, May 17, 2020 (HOL) - Madaxweynaha Kenya Uhuru Kenyatta ayaa mamnuucay dhaqdhaqaaqa xuduudaha dalka ee kala dhexeeya Tansaaniya iyo Soomaaliya si looga hortago faafitaanka cudurka coronavirus.