Kulamo ka dhan ah Al-shabaab oo ka dhacay Gobolka Waqooyi Bari Kenya
Jimco, Janaayo, 24, 2020 (HOL)-Kulamo looga hadlayo Nabadgalyada dalka Kenya sidii Shacabka dhaqan dalka Kenya wada jir ugu wajihi lahaayeen dagaalka ka dhan ah Ururka Al-shabaab ayaa ka dhacay magaalada Nairobi ee dalka Kenya.
Guddoomiyaha Ismaamulka Mandheera, Cali Ibraahim Roba, ayaa faah-faahin ka bixiyay qodobbadii kasoo baxay kulan Shalay ka dhacay halkaasi oo looga hadlayay ammaanka iyo ka hortagga Al-shabaab.
Guddoomiyaha oo Warbaahinta la wadaagay qodobbadii kasoo baxay
kulanka ayaa sheegay in ay ka Dowlad ahaan xoojin doonaan ilaalinta
xadka ay Soomaaliya la wadaagaan, lana kordhin doono kormeerka xagga
ammaanka ah ee ay Ciidamadu samaynayaan.
Mr; Roba, ayaa sidoo kale sheegay in la xoojinayo xiriirka ka dhexeeya Shacabka iyo Askarta, lana joogteeynayo kulamada xagga Ammaanka, iyadoo la samayn doono Boliis keyd ah oo tababaran, iyo dad soo gudbiya xogta Al-Shabaab
Guddoomiye, Cali Ibraahim Roba , ayaa sheegay in ay Bulshada iyo maamulku isla go’aansadeen in ay mas’uuliyad wadareed buuxa iska saaraan
sugidda nabad-gelyada dalka.
Dhawaan ayay ahayd markii ay shirar noocan oo kale ahi ka dhaceen magaalada Gaarrisa iyo degaanno ka tirsan Waqooyi Bari Kenya, iydoo Shacab iyo maamulba ay isla garteen in si wada jir ah looga hortago Al-shabaab.
C/raxmaan Diini, Hiiraan Online
[email protected]