Mas'uuliyiin ka tirsan xisbiga mucaaradka ah ee WADDANI oo xabsiga loo taxaabay
Isniin, November 18, 2019 (HOL )– Masuuliyiin ka tirsan xisbiga mucaaradka ah ee WADANI
ayaa xalay xabsiga loo taxaabay, waxaana xarunti guud ee xisbigoodii la dhigay
ciidamo boolis ah.
Illaa xalay waxa gaaf wareegaeyy
ciidamo badan, kuwaas oo loo diyaariyey inay ka hor tagaan mudaharaadka uu
abaabulayo xisbiga WADDANI.
Xoghayaha guud ee xisbiga WADDANI
khadar Xuseen Cabdi iyo Afhayeenka xisbiga Barkhad Batuun ayaa xabsiga loo
taxaabay, sidoo kale, waxa la xidhay Cabdi Ibraahim Cabdulle oo maalmihii u dambeeyey aad u dhaliilayey
madaxweynaha una bixiyey naanays hadal hayn badan keentay, taas oo uu u bixiyey
Ila meerayso.
Taliyaha ciidanka Booliska
Gen:Maxamed Aadan Saqadhi Dabagalle ayaa sheegay inay gacan bir ah ku qaban
doonaan cidii isku dayday inay samayso mudaharad aan sharciga waafaqsanayn,
waxaanay uga digay dadka wadda mudaharaadka oo uu ula jeedo xisbiga WADDANI.
Xisbiga WADDANI ayaa isagu wali
ku adkaysanaya in uu sameeyo isku soo bax, waxaanu gudoomiye Cirro cambaareeyey
xadhiga masuuliyiinta xisbigiisa.
“Umadda reer Somaliland waxa aan
u xaqiijinayaa in goor dhaweyd sifo sharci darro ah oo aan wax cudur daar ah
lahayn lagu xidhay Xoghayaha Guud iyo Afhayeenka Xisbiga WADDANI, sida ugu adag
ayaan u cambaareynayaa, waana in si degdeg ah xorriyadoodii loogu soo
celiyaa.Shacabka dareenkiisa xadhig iyo cabudhin toona laguma joojin karo.”ayuu
yidhi guodomiye Cirro.
Wadooyinkii imanayey xafiiska
guud ee xisbiga waxa lagu jaray Dhagaxaan si aan xafiiska loo iman, waxaana
ilaalinaya ciidamo badan oo booliska ah.
Barkhad-ladiif M. Cumar, Hiiraan Online
[email protected]
Hargeysa, Somaliland.