Trump oo hakiyay safar ay Nancy Pelosi dibadda ku tegi laheyd khilaafka taagan awgii
Jimco, Janaayo, 18,
2019 (HOL) – Madaxweynaha Maraykanka Donald Trump ayaa dib u dhigay safar ay
gudoomiyaha aqalka Kongarees-ka maalmaha soo socda ku tegi lahayd magaalada
Brussels iyo dalalka Afgaanistaan iyo Masar, waxaa uuna go'aankaasi sabab uga
dhigay hakinta ku timid qayba ka mid ah adeegyadda dowladda.
"Waxaan hubaa in dib u dhigista xafladan
xiriirka dadweynaha ah ay tahay mid munaasab ah'' Madaxweyne Trump ayaa sidaasi
ku sheegay warqad uu qoray.
Mrs Pelosi ayaa ugu baaqday Madaxweyne Trump
habeenkii Arbacadda in uu dib u dhigo khudbadda sanadlaha ah ee dadweynaha
Maraykanka uu u jeediyo marka la fiiriyo ismari waaga siyaasadeed.
Tallaabadan uu Madaxweyne Trump qaaday ayaa ku
soo aadaysa maaliinkii 27-aad oo qaar ka mid ah adeegyadda dowladda ay xiran
yihiin.
Madaxweynahan ka tirsan xisbiga Jamhuurigga ayaa
doonaya in aqalka Kongareeska uu meelmariyoo $5.7bn oo doolar oo ah dhaqaale
lagu dhiso darbi dhexmara xadka Mareykanka iyo Mexico, hasayeeshee waxaa
arrintaasi diiday Dimuqraadiyiinta.
Dib u dhigista safarka gudoomiyaha Aqalka
Wakiillada ee Xisbiga Dimuqraadiga ayaa soo ifbaxday wax ka yar saacad ka hor
inta aysan safarkaasi u amba bixin, sida ay ku waramayaan warbaahiinta
Maraykanka.
Warqadda
safarka lagu joojiyay ayaa waxaa barta bulshada ay ku kulanto ee Twitter soo
dhigay, afhayeenka Aqalka Cad Sarah Sanders.
"Waxaan
dareemayaa in xilligan hadda la joogo ay wanaagsaan lahayd in aad Washington
ila joogtoo oo aan ka wada xaajoonno kana qayb qaadatid dhaqdhaqaaqa lagu
xoojinayo ammniga xadka laguna soo afjarayo khilaafka taagan,'' waxaa sidaas
warqada ku qoray Mr Trump.
"Waxaan rajeynayaa in mardhaw aan kulmi
doono oo aan ugu dambeeyntii eegi doono xududahayaga furan ee khatarta wajahaya
ee koonfuurta, inagoo dareen gaar ah siinayna, maalgelinayna siinaynana
ahmiyadda amaan ee ay leedahay."
Sarkaal ka tirsan Aqalka Cad ee looga taliyo
dalka Maraykanka ayaa waxaa uu warbaahinta dalkaasi u sheegay in madaxweynaha
ay u suuragashay in uu hakiyo safarkii ay Mrs Pelosi iyo wefdi ka socda aqalka
Kongareeska ay ku tegi lahayeen dibadda sababtoo ah waxay isticmaali lahayeen
diyaarad uu milatariga leeyahay.
Xigasho BBC
.