Madaxweyne Farmaajo ‘’ Waan soo dhaweynayaa is badalka ku yimid xiriirkii dowladda dhexe iyo dowlad gobolleedyada
Arbaco, Janaayo, 16, 2019 (HOL)-
Madaxweynaha dowladda Soomaaliya Maxamed Cabdullaahi Farmaajo oo khudbad ka
jeedinayay munaasabadii caleemo saarka madaxweynaha maamulka Koonfur Galbeed ee
maanta ka dhacday magaalada Beydhabo, ayaa sheegay in uu jiro is badal u
bilaawday xiriirka dowladda dhexe iyo dowlad gobolleedyada.
Madaxweynaha ayaa marka hore u
mahad celiyay ciidamada dowladda Soomaaliya iyo kuwa Itoobiya ee qeybta ka ah
howlgalka midowga Africa AMISOM oo sugay amaanka xiliyadii lagu guda jiray
ololaha doorashada, isaga oo dhinaca kalana u mahad celiyay dhamaanba
musharixiintii ka qeybgashay doorashada iyo sida ay u aqbaleen natiijadda.
Madaxweynaha ayaa adkeeyey
muhiimadda uu leeyahay xiriirka Dowlad Goboleedyada iyo Dowladda Dhexe,
isagoona hoosta ka xarriiqay in loo baahan yahay wadashaqayn buuxda, si loo
ilaaliyo qarannimada iyo sharafka shacabka Soomaaliyeed.
‘’Waxaan rabaa in aan hoosta ka
xariiqo hadalladii ay halka ka sheegeen madaxweynaha maamulka Koonfur Galbeed iyo madaxweyne ku-xigeenka Puntland ee ahaa in uu is
badallay xiriirkii dowladda dhexe iyo dowlad gobolleedyada, waayo hal dowlad
ayeenu nahay, hal Dad ayeeynu nahay, looma baahna in la yiraahdo cilaaqaadkii
ayaan kala goosanay, maxaa yeelay waxa loo shaqeynayo waa shacabka
Soomaaliyeed, waxa ku baaba’aya khilaafka labada dhinac waa sharafka iyo sumada
umadda Soomaaliyeed’’ ayuu yiri madaxweyne Farmaajo.
Munaasabada caleema-saarka ayaa waxa ka soo qayb-galay
madax ka socotay goleyaasha Dowladda Federaalka iyo Dowlad Goboleedyada dalka,
duubabka dhaqanka, Xildhibaanno iyo Wasiirro heer Federaal iyo heer Dowlad
Goboleed, wufuud ka socotay Urur-Goboleedka IGAD, Dowladda Itoobiya iyo
Jamhuuriyadda aan walaalaha nahay ee Turkiga.
Dhinaca madaxda dowlad
gobolleedyada munaasabada calleemo saarka kama aysan qeybgalin madaxweynayaasha
dowlad gobolleedyada Galmudug iyo Jubbaland, laakiin dhinaca Galmudug waxaa
joogay madaxweyne ku-xigeenka Maxamed Xaanshi Cabdi Carabey oo ka socday
garabka Galmudug ee Cadaado, sidoo kale waxaa ka qeyb-galay madaxweynaha
maamulka Hirshabeelle Maxamed Cabdi Waare, wafdi uu horkacayay madaxweyne
ku-xigeenka Puntland Axmed Karaash iyo martisharaf kale.
C/raxmaan Diini, Hiiraan Online
[email protected]
