Xildhibaanno ku shiray Dhuusa-Mareeb oo sheegay in ay xilkii ka qaadeen madaxweyne ku-xigeenka Galmudug
Talaado, September, 18, 2018 (HOL) – Xildhibaanno maanta ku
shiray magaalada Dhuusa-Mareeb ayaa sheegay in ay kalsoonidii kala noqdeen
madaxweyne ku-xigeenka maamulka Galmudug Maxamed Cabdi Xaanshi Carabey oo ku
sugan degmada Cadaado.
Xil ka qaadistiisa ayaa la
sheegay in ay u codeeyeen 140 xildhibaan oo ka mid ahaa 142 mudane oo soo
xaadiray fadhiga sida uu ku dhawaaqay guddoomiye ku-xigeenka koowaad ee
Baarlamaanka Galmudug Xareed Cali Xareed.
Arrintan ayaa ka danbeysa
khilaafka ba’an ee ka dhax taagan mas’uuliyiinta sar sare ee maamulka Galmudug,
oo muuqda kuwo siweyn ugu kala qeybsan habka hoggaaminta iyo siyaasada lagu wado
guud ahaan-ba maamul gobolleedka Galmudug.
Xildhibaannada fadhiggoodu yahay
degmada Dhuusa-Mareeb ayaa u codeeyay in ay kalsoonidii kala noqdeen
guddoomiyihii baarlamaanka iyo madaxweyne ku-xigeenka maamulka, halka
xildhibaanno ku shiray Cadaaado oo uu shir guddoominayay Cali
Gacal Casir iyagu-na sheegeen in ay kalsoonidii kala noqdeen madaxweyne Xaaf
iyo guddoomiye ku-xigeenka koowaad ee baarlamaanka, dhinac kastana marka wax laga
weydiiyo sida uu arko xil ka qaadista lagu sameeyay waxaa uu ku sheegayaa in ay
tahay mid sharci darro.
Lama oga halka arinta Galmudug
ku danbeyn doonto, madaama dhamaan mas’uuliyiintii ugu sareysay maamulka
dhinac-ba kan kale uu ku sheegay in kalsoonidii lagala noqday.
C/raxmaan Diini, Hiiraan
Online
[email protected]