Wasaarradda Amniga oo sheegtay in lala xisaabtami doono taliyeyaasha degmooyinka G Banaadir
Talaado, November, 13, 2018 (HOL)
- Iyadoo Jimcihii aynu soo dhaafnay
magaalada Muqdisho ay ka dhaceen Qaraxyo sababay dhimashada dad ka badan 50
ruux ayaa waxaa soo baxaya amarro la farayo taliyeyaasha iyo saraakiisha
ciidamada degmooyinka gobolka Banaadir.
Madaxweynaha Soomaaliya Maxamed
Cabdullaahi Farmaajo oo shir la qaatay saddexda taliye ciidan, Militariga,
Booliiska iyo Asluubta ayaa sheegay in aan la aqbali karin qaraxyada noocan oo
kale ah in ay ka dhacan magaalada Muqdisho, iyadoo guud ahaanba caasimada ay ka
howlgalayaan ciidamo sugaya nabad-galyada, islamarkaana taagan Isgoysyada ugu muhiimsan
magaalada.
Wasiirka Amniga gudaha Maxamed Abuukar Islow Ducaale ayaa sheegay in ay muhiim tahay
in Taliyeyaasha Saldhigyadda ay shaqooyinka loo diray u qabtaan si hufan si
looga hortaggo falalka Amni daradda ee ka dhaca Muqdisho.
Wasiir Islow ayaa taliyeyaasha u sheegay in
lagula xisaabtami doono Ammaanka degmooyinka ay ka taliyaan waxaana uu sidoo
kale ka codsaday ay ka shaqeyaan in wada shaqeyn ay dhexmarto Ciidamada
Ammaanka iyo Shacabka degmooyinka.
Dhinaca kale Ciidamada Ammaanka ayaa howlgallo ay
ka sameeyeen degmada Waabari, waxa ay kusoo qabtaan xubno lagu tuhmaayo in ay
ka tirsan yihiin Ururka Al-Shabaab.
Qaraxyadii Jimcihii lagu weeraray hotelka Saxafi
ee magaalada Muqdisho ayaa waxaa daba socday rag hubeysan oo ka tirsan
Al-shabaab, kuwaa oo ku labisnaa dareyska ciidamada dowladda, waliba kuwoodii
ugu danbeeyay ee dhawaantay la bixiyay.
C/raxmaan Diini, Hiiraan
Online
[email protected]