KOORE “ Imaaraadka waan isku afgaranay dhamaan qodobadii aanu hor dhignay”
Isniin, Maarso, 19, 2018 (HOL) – Weftigii uu hogaaminayey madaxweynaha Somaliland
Muuse Biixi Cabdi ayaa galabta dalka dib ugu soo noqday ka dib markii muddo ku
maqnaa dalka Imaaraadka Carabta.
Wasiirka Khayraadka Biyaha Somaliland Saleebaan
Cali Koore oo weftiga madaxweynaha ka mid ahaa oo afka weftiga ku hadlayey ayaa
sheegay inay booqashadii Imaaraadka ay kala kulmeen arrimo farxad galinaya shacabka
Somaliland,isla markaana waxyaalo badan oo ay hor dhigeen Imaaraadka Carabta ay
isla qaateen.
“weftigi uu madaxweynuhu hogaaminayey waxa loo
soo dhoweeyey si qaranimo ah ,waxaana madaxdii aanu la kullanay ee Imaaraadka
Carabta isla qaadanay dhamaan qodobadii aanu hor dhignay, taas oo farxad u ah
shacabka Somaliland, sidaad og tihiin waxa hal hays u ah xukuumadan cusub ee
ololaha ku galnay weedha ah hore loo soconayaa, dib cid aanu u eegayan ma jirto
qarankuna wuu dhaqaaqay”ayuu yidhi Koore oo ku hadlayey afka weftiga.
Sidoo kale, waxa uu sheegay in Somaliland ay
yeelatay saaxiibo badan, waxaanu yidhi “ waxaanu leenahay saaxiibo aanu ku
kalsoonanay oo na garab taagan, waxaanu aad ugu mahad celinaay dawladda na
marti qaaday waxaanu idin leenahay dadka somaliland qalbigiina wanaag u sheega,
wax aanu ku faraxnay oo idinka idin farxad galin doonna ayaanu kala kulanay
dalka Imaaraadka Carabta, waxaaana la kulanay madax badan oo ka tirsan
wasiiradda.”.
Dhinaca kale, Gudoomiyaha xisbiga UCID Eng:Faysal
Cali Waraabe oo ka mid ahaa weftigan ayaa sheegay in Imaaraadku balan qaadeen
in xoolaha nool dalkooda loo dhoofin doono,isla markaana ka caawin doonaan in
SUcuudiga xoolihii loo dhoofin jirey uu fasaxo, waxa kale oo uu carabka ku
adkeeyey in la ogolaaday in Passporka Somaliland lagu tago dalka isku taga
iMaaraadka.
“Xoolihii waa la ogolaaday oo Imaaraadka waa loo
dhoofinaya, Sucuudigana way ka hawlgalayaan sidii uu xoolaheena u fasaxi
lahaa, xaga amniga gacan weyn bay inaga siinayaan oo hadda waxaanu kaga nimid
taliyeyaashii ciidamadeenna”
Waxa dalka Imaaraadka kaga hadhay guddi farsamo
oo fulin doonna qodobaddii lagu wada hadlay, waxaaanay kala yihiin
taliyeyaashii ciidamadda, wasiirka Isgaadhsiinta, wasiirka Xanaanada xoolaha
iyo Kalluumaysiga, Gudoomiyaha Baanka dhexe iyo xubno kale.
Barkhad-ladiif M. Cumar, Hiiraan Online
[email protected]
Hargeysa, Somaliland.
