Puntland oo faah faahin ka bixisay siyaasiyiin lagu xiray Garoowe
Sabti,
October, 14, 2017 (HOL) – Guddoomiyaha gobolka Nuugaal ee dowlad gobolleedka
Puntland Cumar Cabdullaahi Faraweyne ayaa faah faahin dheeraad ah ka bixiyay
siyaasiyiin lagu xiray magaalada Garoowe.
Guddoomiyaha
ayaa sheegay shaqsiyaadka la xiray baalmareen sharciga iyo dastuurka Puntland islamarkaana
sameysteen sida uu hadalka u dhigay madal ama Urur aan meelna ka waafaqsaneyn
sida uu hadalka u yiri dastuurka iyo sharciga dowlad gobolleedka Puntland.
Siyaasiyiinta iyo ganacsatada la xirey ayaa waxaa ka mid ah C/rixmaan Siciid
Maxamud (Dhegawayne),Daahir Ciiro iyo Feysal Faarax Cali oo
dhamaan horay xilal ugaga soo qabtay dowlada dhexe iyo maamul goboleedka
Puntland waxana ay ka soo horjeesteen shirka Kismaayo.
Guddoomiyaha gobolka Nuugaal ayaa sheegay in siyaasiyiintan la horkeeno
doono sharciga, cid kasta oo ka hortimaada sharciga iyo dastuurka Puntland na
talaabo laga qaadi doono.
‘’Dadkan la xirxiray Annigu siyaasiyiin in ay ahaayeen uma arko, waxey
ahaayeen dad nabad-galyo qalqal ku ah, cid kasta oo tallaabo noocaas ah qaadana
sharciga ayaa la horgeynayaa’’ ayuu yiri guddoomiyaha gobolka Nuugaal.
Maamulka Puntland ayaa wajahaya culeys uga imanaya siyaasiyiin ka biyo
diidan habka hogaaminta madaxweyne Cabdiwali Maxamed Cali Gaas.
C/raxmaan Diini,
Hiiraan Online
[email protected]