Madaxweyne Farmaajo xafiiskiisa suray sawirka madaxweynihii hore ee Aadan Cabdulle Cismaan
Khamiis,May, 18, 2017 (HOL)- Madaxweynaha dowladda Soomaaliya Maxamed
Cabdullaahi Farmaajo ayaa xafiiskiisa shaqada suray sawirka madaxweynihii ugu horeeyay
ee Soomaaliya Aadan Cabdulle Cismaan [Aadan Cadde] isaga oo faah faahin ka
bixiyay sababta uu sidaa u sameeyay.
Madaxweynaha ayaa sawirkiisa ku badallay kan Madaxweynihii ugu horeeyay
Soomaaliya Allaha u naxariistee Aadan Cadde , waxaana arrintan ay noqotay mid dad badan ay
hadal hayeen, islamarkaana ku cusub xarunta madaxtooyada iyo xafiiska shaqo ee
madaxweynaha.
“Markaan arkayo subax walba
sawirkiisa, macnaheeda waxay tahay in lagu daydo oo dalkaan u gudbay
dimoqraadiyad, runtii aan dooneyno in aan horumarino dimoqraadiyada,
taariikhdna mar walba aan xusno, isna uu ka ahaa astaan wanaagsan”ayuu yiri
Madaxweyne Farmaajo.
In xafiiska madaxweynaha la suro sawirka madaxweynaha tallada haya ayaa ah qodob dastuuri ah, gaar ahaan qodobka 87 Faqradiisa B, hasse ahaatee arintan ayuu madaxweynaha ku tilmaamay dhiiri-galin.
C/raxmaan Diini, Hiiraan Online
[email protected]
