Dabley Caaqil ku dhaawacay degmada Laascaanood ee gobolka Sool
Arbaco,
May, 17, 2017 (HOL)- Caqabad weyn ayaa ka hor timid wadahadal laba beelood uga
qabsoomi lahaa Gobolka Sool kadib markii dabley hubaysan rasaas ku fureen
Caaqil ka mid ah labada beelood habeenimadii Xalay.
Caaqilka oo lagu Magcaabo Maxamed
Xaaji Ismaaciil ayaa lagu tilmaamaa dadka sida aadka ah ugu ololaynayey siddii
loo soo afjari lahaa colaad mudo dheer u dhexaysey beeshiisa iyo beel ay wada
degaan koonfurta degmada Laascaanood.
Caaqilka oo sida ay sheegeen
dhakhaatiirta caafimaadka Laascaanood ay ku dheceen saddex xabadood ayaa loo
qaaday dhinaca magaalada Hargeysa waxaana la sheegayaa in xaalkiisa uu haatan
ka soo raynayo.
Lama sheegin dableydan hubaysan ee
Caaqilka dhaawacay haybtooda, waxaase warar aan la xaqiijin sheegayaan in
Caaqilku sheegay in uu garanayo cida rasaasta ku dhufatay.
Arintan ayaa timid waqti
madax-dhaqameed aad u badan ay degaano kala duwan isaga yimaadeen sidii ay xal
kamadambaysa ugu gaari lahaayeen xalaada cakiran ee ka taagan Koonfurta degmada
Laascaanood.
Dhinaca kalena wasiirka arimaha gudaha
Somallland Yaasiin Maxamuud Xiir ayaa soo gaaray shalay magaalada Laascaanood
iyadoo la sheegayo in safarkiisa ku wajahnaa xaalada labadaas beelood xal u
raadintooda.
Ilaa hada ma jirto cid ka hadashay
aritan soo korodhay oo laga cabsi qabo in ay caqabad ku noqoto wadahadalada
labada beelood waa haday cadaato in gacanta dhexdooda tahay
Seynab Cabdi Warsame
[email protected]
Laascaanood G Sool