Faah faahin ku saabsan Qarax ka dhacay xarunta School Polizio ee magaalada Muqdisho
Khamiis, December, 14, 2017 (HOL) – Faah faahinno dheeraad
ah ayaa ka soo baxaya weerar ismiidaamin ah oo uu fuliyay qof isku soo xiray
walxaha Qarxa oo subaxnimadii hore ee saakay ka dhacay Xarunta School Polizio ‘’
Gen Kaahiye’’ ee magaalada Muqdisho.
Qaraxa oo ahaa mid
xoogan oo laga maqlay inta badan xaafadaha magaalada Muqdisho ayaa lagu soo
waramayaa in uu sababay dhimashada tiro ka badan 10 Askari oo ka tirsanaa
ciidamada Booliiska goobta ku sugnaa waqtiga uu Qaraxu dhacay.
Qof tagay goobta uu qaraxa ka dhacay oo la hadlay Hiiraan Online ayaa sheegay in uu
arkay tiro badan oo ka mid ah meydadka Askar ka tirsan ciidamada Booliiska
laakiin ma uusan sheegin tiro dhimasho oo rasmi ah.
Askari ka mid ahaa ciidamada Booliiska oo goobta joogay
oo isna la hadlay warbaahinta ayaa sheegay in uu arkay dhimashada 7 Askari oo
ka tirsan ciidamada Booliiska Soomaaliyeed, sidoo kale waxaa jira dhaawacyo loo
qaaday goobaha caafimaadka.
Ciidamada la bartilmaameedsaday ayaa la sheegay in ay u
diyaar garoobayeen 20 December oo ku beegan Aas Aaska ciidamada Booliiska
Soomaliyeed.
C/raxmaan Diini, Hiiraan Online
[email protected]