Muuse Biixi : Shantii Soomaaliyeed Soomaaliya oo kaliya ayaa ka maqan munaasabadan caleemo saarka
Arbaco, December, 13, 2017 (HOL) – Madaxweynaha Cusub ee Somaliland ayaa sheegay in shantii
Soomaaliyeed ay Soomaaliya oo kaliya ka maqnayd munaasibadda caleemo saarka,
waxaanu taas ku sababeeyey in aanay Somaliland u aqoonsanayn qaran madax
banaan.
Sidoo
kale, waxa uu Soomaaliya usoo jeediyey si ay dalkeedda wax ugu qabato oo ay ka
madax banaanaato ku tiirsanaanta beesha caalamka iyo ciidamada shisheeye.
Sidoo
kale, madaxweynaha Cusub waxa uu sheegay in aanay beesha caalamku wax deyn ah
ku lahayn arrimaha Somaliland, isla markaana ay kaligeed isku filnaatay oo ay
hawlaheeda qabsatay.
“Waxaan
leeyahay dalalka soomaaliyeed Jabuuti, qaybta Itoobiya, qaybta Kenya, Somaliland
waxa inaga dhiman qaybtii Muqdisho oo ay ahayd iyaguna iyagoo qaranka
Somaliland ictiraafsan inay ka soo qaybgalaan, waxaana filayaa indhowaan ka soo
qaybgali doonaan oo aanu iskaashan doonno anagoo dad iyo dhaqanba wadaagno
laakiin ay suuroobi wayday in aanu dal wada noqono duruufiihii dhacay awgeed
dabadeedna nin waliba dawldiisa uu gaar u dhistay, iyagana waanu u duceynaa
inay dhibaatadda ka baxaan, anagana ha nagu hambalyeeyaan horumarkayga aanu
gaadhnay.”ayuu yidhi madaxweynaha Cusub Biixi.
Mar
uu ka hadlayey sida uu arko xilkan loo doortay iyo culayskiisa waxa uu yidhi
“Waxaan dareemaya culayska uu leeyahay xilkan la ii dhiibay, waxaana
xasuusanaya wixii dhibaato ah ee loo soo maray qarankeena, sharafta aynu ku
jirno waa dhigii dadkii naftoodda usoo huray ilaa daraawiish illaa SNM”.
Sidoo
kale, waxa uu hadlay in aanay beesha caalamku wax badan ku darsan Somaliland,
waxaanu yidhi “caalamka waxaan u sheegayaa in aanu deyn nagu lahayn oo aanu
Baanka aduunka ee weyni na caawinin, Baanka Afrika iyo Baanka Islaamka
midkoodna naga caawinin doorashooyinka anaga iyo ilaahay uunbaa isku
tashannay”.
Mar
uu fariin u dirayey Soomaaliya waxa uu yidhi “ walaalahayga Soomaaliya joogana
waxaan u sheegayaa inay isku tashadaan oo ay kabaxaan ku tiirsanaanta dawlaha
shisheeye iyo ciidamo ajanabiga ah”.
Dhinaca
kale, waxa madaxweynaha cusub la dardaarmay madaxweynihii xilka ku wareejiyey
Axmed Siilaanyo, madaxweynihii hore Daahir Rayaale Kaahin , waxa kale oo
madasha kahadlay xubno ka mid ah weftiga ka yimid dalalka Jaarka, iyadoo
masuuliyiin ka kala yimaadeen dalka Jabuuti, Kililka shanaad ee
Soomaalida, fadaraalka Itoobiya iyo haweenay xildhibaanada oo ka socotay dalka
Kenya, kuwaas oo dhamaantood soomaali ahaa.
Barkhad-ladiif M. Cumar, Hiiraan Online
[email protected]
Hargeysa, Somaliland.