Xildhibaannada Baarlamaanka oo meelmariyay Miisaaniyada Dowladda sanadkan 2018ka
Arbaco, December, 13, 2017 (HOL) – Xildhibaanada Baarlamaanka Soomaaliya
ayaa goor dhow ansixiyay Miisaaniyadda sanadka 2018, kaddib markii dood adag ay
ka yeesheen Miisaaniyadda oo ay horay u soo ansixiyeen Golaha Wasiirada.
Kulanka Baarlamaanka oo uu shir guddoominayay Guddoomiye kuxigeenka 1aad
C/wali Ibraahim Muudey ayaa waxaa soo xaadirtay 164 Xildhibaan.
Dood Xildhibaanada ka yeesheen Miisaaniyaddan oo dhowaan Guddiga Maaliyadda
warbixin ka soo diyaariyay ayaa ugu dambeyn cod gacan taag loo qaaday.
Guddoomiye kuxigeenka 1aad ee Baarlamaanka C/wali Ibraahim Muudey ayaa ku
dhawaaqay natiijada codka, waxaana uu xusay in 162 Mudane ay ogolaatay, waxaa
ka aamusay 1 Xildhibaan, halka xildhibaan kalana uu diiday.
Wasiirka Maaliyadda C/raxmaan Ducaale Beyle oo markii la ansixiyay ka hadlay
ayaa soo dhoweeyay ansixinta Miisaaniyadda, isagoo ku tilmaamay tallaabo
wanaagsan.
Miisaaniyadda 2018 ee dowladda Federaalka Soomaaliya ayaa gaareysa lacag
dhan $274,640,191 (labo boqol iyo toddobaadan iyo afar Milyan, lix boqol iyo
afartan kun, boqol iyo sagaashan kow dollar).
Miisaaniyaddii hore ayaa ahayd 260 milyan, Farqiga u dhaxeeya labada
miisaaniyadood ee 2017 iyo tan cusub ee 2018 ayaa ah 14 milyan oo micnaheedu
yahay 5.63% ayaa ku korortay Miisaaniyada cusub ee 2018.
C/raxmaan Diini, Hiiraan Online
[email protected]