Dowladda Qatar “Waan soo dhoweyneynaa go'aankii Sacuudiga uu xuduuda ugu furay xujeyda dalka Qatar ka imaaneysa”
Jimco, Augusto, 18, 2017 (HOL) –Sheikh Mohammed bin Abdulrahman Al Thani,
Wasiirka Arrimaha Dibadda Qatar, oo la hadlay warbaahinta ayaa sheegay in ay
aad usoo dhoweynayaa go'aankii Sacuudiga uu xuduuda ugu furay xujeyda ka
imaaneysa dalka Qatar.
“Markii horeba dowladda Sacuudiga waxaa ay siyaasad ka laheyd qorshihii ay
xujeyda ugu diiday Xajka”, ayuu hadalkiisa sii raaciyay.
Dowladda Sacuudiga, ayaa bishii June sheegtay in xujeyda reer Qatar ay
Sacuudiga ku imaan karaan oo keliya safarda xagga cirka, ka dib markii ay
xirtay xuduuda Salwa.
Tan iyo bishii June markii go’aankaasi uu kasoo yeeray Sacuudiga, ayaa waxaa
wal-wal xooggan uu lasoo dersay xujeyda, waxaana la arkayay xujey badan oo
aadeysa waddamo kale si ay halkaasi uga soo aadaan dalka Sacuudiga.
Dowladdaha Sacuudi Carabiya, Masar, Baxrayn iyo Isutagga Imaaraadka Carrabta
ayaa xiriirkii diplomaasiyadeed u jaray dawladda Qadar, iyaga oo ku eedeeyay in
ay daganaansho la'aan ka wado gobolka.
Dowladda Masar, ayaa Qadar ku eedeysay in ay taageerto kooxda Muslim
Brotherhood ee dalka Masar ku sugan, sida wakaalladda Wararka ee dalka Masar ay
sheegtay.
Dhinaca kale Sacuudi Carabiya ayaa sheegtay in ay ka xiratay xadkeeda
dawladda Qadar ayna arrintaasi saamaynayso dhammaan isu socodkii dhulka, biyaha
iyo hawadaba, sida wakaalladda wararka ee dalkasi ay sheegtay.
Hiiraan Online,
Hassan Istiila
[email protected]
Mogadishu,Somalia