Mareykanka “Dowladda Soomaaliya waxaan ku ammaaneynaa fududeynta iyo isa-soo dhiibidda Abu Mansoor”
Arbaco, Augusto, 16, 2017 (HOL) –Dowladda Mareykanka ayaa dowladda
Federaalka ee Soomaaliya ku ammaantay fududeynta iyo isa-soo dhiibidda
hoggaamiyihii hore ee Xarakadda Al Shabaab Mukhtaar Roobow Abuu Mansoor.
“Dowladda Mareykanka waxaa ay taageereysaa nidaamka dowladda Soomaaliya ay
waddo oo ah bahdilka saameynta Al Shabaab oo ay kamid tahay isa-soo dhiibitadda
hogaamiyaasha sar-sare ee kooxda”, waa sida lagu sheegay war-saxaafadeedka
kasoo baxay dowladda Mareykanka.
Sidoo kale dowladda Mareykanka ayaa sheegtay in ay taageereyso
dib-u-heshiisiinta, xaqiijinta dowladnimadda iyo helidda adeegyadda.
Dhinaca kale dowladda Mareykanka, ayaa ku boorisay dowladda Federaalka ee
Soomaaliya in ay sii waddo abuuridda waddooyinka xubnaha Al Shabaab ay ku diidi
karaan xagjirnimada uguna soo biiri karaan dadaaladda dib-u-dhiska nabadda
dalka Soomaaliya.
Bishii lasoo dhaafay, Mareykanka ayaa liiska Argagixisada ka saartay Sheekh
Mukhtaar Roobow Abuu Mansuur oo ka mid ahaa Saraakiisha sar sare ee Al-Shabaab.
Abuu Mansoor ayaa ahaa Hoggaamiye ku-xigeenki hore ee Al-Shabaab, sidoo kale
waxaa uu mar soo noqday Afhayeenka Al-Shabaab.
Waaxda Arrimaha Dibadda Mareykanka ayaa sheegtay in Abuu Mansuur laga saaray
liiska Argagixisada Caalamiga, waxaana madaxiisa dul saarnaa 5 milyan oo
dollar.
Dowladda Soomaaliya maxey ka tiri?
Dowladda Soomaaliya ayaa shaaca ka qaaday inay soo dhoweeneyso, wada-hadalna
kula jirto hoggaamiye ku-xigeenkii hore ee kooxda Al-Shabaab Mukhtaar Roobow
Cali Abu Mansuur, oo dhowaan dowladda isku soo dhiibay.
“Siyaasadda Dowladda Federaalka Soomaaliya waxaa aasaas u ah in shakhsigii
ka waantooba falalka argagaxisnimada ah, doonayana inuu ka qeyb qaato
nabadeynta dalka in lasoo dhaweeyo, Sidaas darteed, Dowlada Federaalka
Soomaaliya waxey soo dhaweyneysaa Mukhtar Roobow Cali oo Muqdisho jooga,
xaqiijiyeyna inuu ka baxay kooxda Al-Shabaab.” ayaa lagu yiri qoraal kasoo
baxay wasaaradda warfaafinta dowladda.
Hadalka dowladda ayaa yimid, saacado kadib markii Roobow oo shir jaraa’id ku
qabtay Muqdisho, uu sheegay inuu Al-Shabab ka baxay shan sano iyo toddoba
bilood ka hor.
Dowladda waxa ay sidoo kale sheegtay in “iyada oo laga duulayo cafiskii
Madaxweyne Maxamed Cabdullaahi Farmaajo, ay dowladdu ballanqaadeyso inay soo
dhoweyneyso cid walba oo ka tanaasusha fikirka Al-Shabaab”.
Waa kuma Abuu Mansuur?
Roboow Abuu Masnuur, ayaa waxaa uu 10-ka bishii October ee sanadkii 1969-kii
uu ku dhashay magaalladda Xudur ee caasimada Gobolka Bakool ee Soomaaliya.
Waxaa uu kutubo ka raacan jiray masjidyo ku yaalla magaalladda Muqdishu,
halkaas oo uu sidoo kale uu ku noolaa. Sanadkii 1990-kii ayuu Islamic Law uu ka
soo bartay jaamacadda Univetsity of Khartoum ee dalka Sudan.
Roboow, ayaa markii dambe kusoo noqday magaalladda Muqdishu waxaana uu la
shaqa bilaabay hay’ad la yirahdo Saudi Al-Hamamain Foundation. Markii dambe
dowladda Mareykanka ayaa ku eedeysay in uu xiriir la leeyahay kooxaha
argagixisada.
Mukhaar Roboow, ayaa markii dambe ku biiray Maxkamadihii Islaamka, waxaana
uu kasoo noqday taliye ku-xigeen, xiligaasi oo ay maamulayeen koonfurta dalka
Soomaaliya.
Roboow iyo hogaamiyaal kale oo Al Shabaab ka tirsan hadda, ayaa markii
maxkamaddaha ay bur-bureen waxaa ay ku biireen Al Shabaab, halkaasi oo ay kasii
wadeen dagaalkooda ay kaga soo horjeedaan dowladda.
Intaasi kadib waxaa uu isaga iyo qaar kamid ah hogaamiyaasha Al Shabaab ay
ku fakar noqon waayeen hogaamiyihiin Al Shabaab Abmed Abdi Godan, xiligaasi oo
uu khilaafkooda uu ka bilowday magaalladda Barawe bishii June ee sanadkii 2013.
Godane, markii dambe waxaa dilay dowladda Mareykanka. Balse Mareykanka ayaa
lacago dul dhigtay Mansuur. Intaasi kadib waxaa uu goostay in uu isaga baxo
kooxda Al Shabaab.
Hiiraan Online,
Hassan Istiila
[email protected]
Mogadishu,Somalia