Maxkamad ku taal dalka India oo xukuntay maxaabiis Soomaali ah
Sabti, Augusto 12, 2017 (HOL) –Maxkamad ku taalla dalka India ayaa shalay oo
jimco aheyd xukun ku riday 27 qof oo Soomaali ah, kuwaas oo ciidamada India
sanadkii 2011 ay ka qabteen badda dalkaasi.
27-ka qof ayaa midkiiba lagu xukumay todobo sano oo xabsi ah, iyadoona sidoo
kale maxaabiista lagu ganaaxday 17,000 oo Rubbiis in midkiiba uu bixiyo.
Maxaabiista ayaa waxaa la filayaa in Dowladda Soomaliya lagu soo wareejiyo,
waxaana maxkamadda ay ku eedeysay in ay horay u afduubteen doomo iyo maraakiib
laga leeyahay dalka India.
Wasiirka arrimaha dibadda ee Dowladda Federaalka Soomaaliya Mudane Yuusuf
Garaad Cumar, oo dhawaan dalka India u tegay arrimo la xiriira maxaabiista
Soomaalidda ee dalkasi ku xiray, ayaa sheegay in guulo la taaban karo ay
arrintaasi kasoo gaareen.
Dadaalka Dowladda Soomaaliya ay ugu jirto sidii loo soo deyn lahaa maxaabiis
badan oo Soomaaliya uga xiran xabsiyo kuyaalla daafaha caalamka ayaa ka mid ah
talaabooyinkii ay Dowladdu qaaday, iyadoo ay soconayaan qorshayaal kale.
“Dhawaan waxaan heshiis la soo saxiixanay madaxda dalka India kaasi oo ku
saabsan sidii loo sii deyn lahaa maxaabiista xabsiyada dalkaasi kujirta, waana
la soo deynayaan, sidoo kale waxaan maamulka Jasiirada Seyshells aan
madaxdeeda kala hadalnay sidii xoriyadooda loo siin lahaa maxaabiis
Soomaaliyeed oo kujirta xabsiyada dalkaasi xukunkoodana ay Soomaaliya ku
dhameystaan”, ayuu yiri Yuusf Wasiir Garad Cumar.
Hiiraan Online,
Hassan Istiila
[email protected]
Mogadishu,Somalia
