3/29/2024
Today from Hiiraan Online:  _
Wararka Maanta- Arbaco, Nov 21, 2012
Baarlamaanka Kenya oo Maanta ka dooday Howgalkii Milateriga Kenya ee Gaarisa, Guddina u saaray Baarista Howgalladaas
Arbaco, November 21, 2012 (HOL) — Baarlamaanka dalka Kenya ayaa maanta ka dooday howgalladii ay ciidamada milateriga Kenya ka fuliyeen magaalada Gaarisa ee gobolka Waqooyi-bari Kenya, kaasoo ay dad ku dhinteen, kuwo kale ay dhaawacyo, sidoo kalena geystay burbur hantiyeed oo fara badan.

Xildhibaanka laga soo doorto deegaanka Dhuujis ee degmada Gaarisa, Aadan Barre Ducaale oo baarlamaanka hortiisa ka hadlayay ayaa sheegay in ciidamada milateriga Kenya iyagoo aan cidna kala tashan ay howgallo ka billaabeen wadooyinka Gaarisa, isagoo ka dalbaday madaxweynaha Kenya inuu soo farageliyo arrintan.

"Taliyaha guud ee ciidamada Kenya madaxweyne Mwai Kibaki kama aamusi karo xad-gudubyada ay milaterigu ka geysteen Gaarisa, haddii uu aamusay markii dadka lagu laayay Tanariva, haddii uu aamusay markii 45 askari lagu dilay deegaanka Baragoy, kama aamusi karo waxa ka dhacay Gaarisa. Wasiirka difaacu wuxuu noo ballan-qaaday in madaxweynaha uu kala hadli doono inuu shacabka Kenya kala hadlo wixii ka dhacay Gaarisa," ayuu yiri mudane Aadan Barre.

Mudanayaasha baarlamaanka Kenya ayaa waxay shaki geliyay doorka uu milaterigu ku leeyahay marka ay timaado dhibaato dalka gudihiisa ah iyadoo aan loo fasaxin in ay howgallo sameeyaan. Waxaana arrintan ka hadlay xildhibaan Yuusuf Xasan oo laga soo doorto degmada Kamakunji oo ay ku taallo xaafadda Islii ee Nairobi.

"Dalku miyuu burburay, ma waxaan ku jirnaa xaalad dagaal. Uma maleynayo inuu jiro waddan caadi ah oo milaterigiisa u isticmaalaya arrimaha gudaha iyadoo dalka uu yahay mid ammaan ah. Sidaa daraadeed qiil ma loo heli karaa inaan milateriga u adeegsanno arrimaha gudaha," ayuu Yuusuf Xasan.

Fadhigii baarlamaanka Kenya ayaa waxay saacado badan ku qaadatay in la dhiso guddi baaritaan ku sameeya baaritaanka dhacadii Gaarisa oo ay dad badan waxyeelo kasoo gaartay. Waxaana sidoo kale howgalka milateriga ee Gaarisa ka dhacay cambaareeyay xildhibaanad Mili Odiyambo.

"Xitaa waxaa khalad ah in kulammada baarlamaanka ay halkan sii socdaan arrimo dhowr ah oo aad u daran awgood, waxaa ka mid ah arrinta ka dhacday Gaarisa, waxaan ka walaacsanahay inaan ku laabannay xilliyadii madoobaa ee dadka la layn jiray. Waa inaan deg-deg u joojinno kulammada baarlamaanka oo aan ka tashannaa arrimaha dhacaya," ayay tiri Odiyambo.

Degmada Gaarisa ayaa deggen kaddib laba maalmood oo milateriga Kenya ay howgallo khasaare naf iyo maalba ah geystay ay ka sameeyeen magaaladaas, taas oo ka dhalatay dilka saddex askari oo ka tirsan milateriga, iyadoo aan illaa iyo hadda la ogaan cidda ka dambeysay dilka askartaas.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
11/21/2012 7:39 AM EST
Arbaco, November 21, 2012 (HOL) — Maxkamadda ciidamada qalabka sida ee dowladda Soomaaliya ayaa maanta xabsiga dhigtay wariye Ibraahim Maxamed Aadan oo ahaa wariyihii BBC-da laanta afka Soomaaliga uga warrami jiray magaalada Muqdisho ee xarunta Soomaaliya.

11/21/2012 7:07 AM EST
Arbaco, November 21, 2012 (HOL) — Tababar ku saabsan horumarinta ganacsiga bulshada ayaa maanta laga furay Muqdisho, kaasoo socon doono muddo shan casho ah oo ka billaabanaysa maanta kuna eg Axadda soo socota, waxaana ka faa'iideysan doona tababarka 19 qof oo ka socday shirkado ka howgala Soomaaliya.

11/21/2012 6:43 AM EST
Arbaco, November 21, 2012 (HOL) — Madaxweynaha Soomaaliya, Mudane Xasan Sheekh Maxmuud ayaa xarunta madaxtooyada Soomaaliya kula kulmay wafdi ka socday dalka Ingiriiska, isagoo ku wareejiyay dhul ay ka dhistaan safaaraddooda Soomaaliya.

11/21/2012 6:31 AM EST
Arbaco, November 21, 2012 (HOL) — Madasha bulshada rayidka Soomaaliya ayaa ka doodday lixdii qodob ee uu ku dhawaaqay madaxweynaha Soomaaliya kuwasaoo uu sheegay inay saldhig u noqon doonaan waxqabadka dowladdiisa, waxayna sidoo kale ugu hambalyeeyeen ra’iisul wasaare Soomaaliya, Cabdi Faarax Shir0doon (Saacid) sida uu uga gudbay hannaankii wax-qeybsi ee 4.5 iyo kaalintii uu xubnihii uu haweenka ka siiyay golihiisa wasiirradda oo ay sheegeen inay tahay mid aan horay loo arag.

11/21/2012 6:16 AM EST
Arbaco, November 21, 2012 (HOL) — Safaaradda Soomaaliya ay ku leedahay dalka Belgium ayaa ku guuleysatay inay xarunta safaaraddaas ka saarto dad si sharci daro ah kuu deggenaa muddo 18 sano ah, iyadoo arrintan ay timid kaddib markii ay maxkamadda Belgium go'aan ku gaartay in in dadka deggen xaruntaas safaaradda ay isaga baxaan.

11/21/2012 5:07 AM EST
Arbaco, November 21, 2012 (HOL) —Wararka aynu ka heleyno magaalada Kismaayo ayaa sheegaya in saaka aroortii uu dagaal xooggan ka dhacay deegaanka Yoontoy oo qiyaastii 25-KM dhanka waqooyi kaga began magaalada Kismaayo ee xarunta gobolka Jubada Hoose.

11/21/2012 5:06 AM EST
Arbaco, November 21, 2012 (HOL) — Xarakada Al-shabaab ayaa iska fogeysay inay mas'uul ka tahay weerarkii qaraxa ahaa ee Axaddii lasoo dhaafay ka dhacay Nairobi kaasoo ay dad badan oo shacab ah wax ku noqdeen.

11/21/2012 1:40 AM EST
Arbaco, November 21, 2012 (HOL) — Guddoomiyaha baarlamanka Soomaaliya, Prof. Maxamed Sheekh Cismaan (Jawaari) ayaa sheegay in toddobaadka soo socda ay xubnaha baarlamaanka Soomaaliya ansixin donaan xeer hoosaadka baarlamanka uu ku shaqeynayo afarta sano ee soo socota, iyadoo ay toddobadyadii lasoo dhaafay socdeen doodo ay xildhibaannadu ka yeelanayaan qodobbada xeer hoosaadka.

11/21/2012 1:36 AM EST
Arbaco, November 21, 2012 (HOL) — Wasiirka gaashaandhigga Kenya, Maxamed Yuusuf Xaaji ayaa gaaray magaalada Gaarisa ee gobolka Waqooyi-bari Kenya gallinkii dambe ee shalay oo Salaaso ahayd, iyadoo la sheegay in xaaladdu ay saakay tahay mid deggen.