3/29/2024
Today from Hiiraan Online:  _
Wararka Maanta- Arbaco, May 30, 2012
Xiisado Dagaal oo Maanta laga dareemay Duleedka Degmada Afmadoow ee Gobolka Jubbada Hoose

Arbaco, May 30, 2012 (HOL) — Waxaa maanta xiisado dagaal laga dareemayaa deegaanada hoostaga Degmada Afmadow ee gobolka Jubada Hoose, halkaasoo ay isku horfadhiyaan ciidamada dowladda KMG iyo kuwa Raaskaambooni oo kaashanaya Militariga Kenya iyo Xarakada Al-shabaab.

Xiisadahani dagaal ayaa yimid kadib markii ciidamada dowladda KMG iyo kuwa Kenya ee ku sugnaa deegaanka Xayo ay bilaabeen dhaqdhaqaaqyo ciidan oo ay ku doonayaan in ay ku weeraraan degmada Afmadow oo ay ku xoogganyihiin Xarakada Al-shabaab.

Guud ahaan degmada Afmadow iyo deegaanada ku Xeeran ayaa maanta waxa ka jirto cabsi ay dadka ku dhaqan halkaasi ka qabaan in uu qarxo dagaal dhexmara ciidamada huwanta ah iyo Al-shabaab.

Saraakiil katirsan ciidamada dowladda KMG oo si kooban warbaahinta ula hadlay ayaa sheegay in ciidamada isbaheysiga ah ay saaka bilaabeen dhaqdhaqaaqyo ay ku doonayaan in ay ku weeraraan magaalada Afmadow ee gobolka Jubada Hoose.

Wararka aynu ka heleyno degmada Afmadow ayaa sheegaya in Dagaalyahanno aad u badan oo katirsan Al-shabaab ay magaalada soo buuxdhaafiyeen kuwaasoo ku biiray ciidamada difaaca kaga jira deegaanka Xayo oo hoostaga degmada Afmadow.

Dhinaca kale waxaa xalay ilaa maanta ku socdo magaalada Kismaayo Duqeymo ay geysanayaan maraakiib shisheeye oo la aaminsayahay in ay leedahay dowladda Kenya.

Wararkii ugu danbeeyay ee aynu ka heleyno Kismaayo ayaa sheegaya in duqeymuhu ay socdeen xalay ilaa saaka walow khasaaraha ka dhashay uu yahay mid aan sidaa u badnayn, hadana waxa jirto cabsi ay shacabka ka qabaan in duqeymahaasi ay waxyeelo u geystaan.

Inta la ogyahay Ilaa imika ma jirto cid wax ku noqotay duqeymihii xalay ilaa maanta ku socday Kismaayo, waxaana gudoomiyaha Al-shabaab ee Kismaayo Sheekh Xasan Yacquub uu sheegay in ay iska caabiyeen weerar ay kusoo qaadeen maraakiib Dagaal.

Xasan Nuur, Hiiraan Online
[email protected]
Kismaayo, Soomaaliya













Click here
5/30/2012 10:35 AM EST
Arbaco, May 30, 2012 (HOL) — Hay'adda dhakhaatiirta aan xuduudda lahayn ee MSF ayaa sheegtay in lagu wargeliyay in Axmad Salaad Farey oo ah shaqaala hore oo MSF ka tirsanaa lagu helay dambi ah ah dilka laba ka mid ah shaqalaheena oo kala ahaa, Dr Karel Keiluhu oo loo yaqaana Kace iyo Phillipe Havet 29-kii December 2011, xilli ay labadan shaqaalaha ah ku jireen howlahooda iyadoo Axmad 30-sano o xabsi ah lagu xukumay.

5/30/2012 10:11 AM EST
Arbaco, May 30, 2012 (HOL) — Booliiska Kenya ayaa sheegay maanta oo Arbaco ah in afar askartooda ka tirsan lagu dhaawacay weerar gaadmo ah oo kooxo hubeysan ay shalay ku qaadeen kolonyo gaadiid ah oo ay ciidamadooda wateen xilli ay kasoo bas ay kooxo hubeysan ku weerareen Dhadhaab.

5/30/2012 9:55 AM EST
Arbaco, May 30, 2012 (HOL) — Xisbiga Nabadda iyo Horumarka oo ka mid ah xisbiyada siyaasadeed ee ka jira Soomaaliya ayaa warsaxaafadeed kasoo saaray shirka Istanbul II ee looga hadlayo mustaqbalka Soomaaliya, kaasoo lagu wado inay ka qaybgalaan dhinacyada siyaasadda Soomaaliya.

5/30/2012 9:25 AM EST
Arbaco, May 30, 2012 (HOL) — Madaxweynayaasha Puntland iyo Galmudug oo horay uga soo horjeestay ka qaybgalka shirka Istanbuul ee looga hadlayo arrimaha Soomaaliya ayaa sheegay inay ka qaybgalayaan iyadoo sheegay in la xalliyay khilaafkii sababay inay shirkaas ka qaybgalkiisa diidaan.

5/30/2012 6:44 AM EST
Xildhibaanada baarlamaanka ee taageersan Madoobe Nuunow Maxamed ayaa gaashaanka ku dhuftay go'aannadii kasoo baxay shirkii dhawaan ay saxiixayaasha Roadmapku ku yeesheen magaalada Addis ababa ee xarunta dalka Itoobiya.

5/30/2012 5:56 AM EST
Arbaco, May 30, 2012(HOL): Ra’iisul Wasaaraha Soomaaliya Dr. Cabdiweli Maxamed Cali Gaas iyo wefdi ballaaran oo uu hogaaminayo ayaa maanta gelinkii dambe soo gaaray magaalada Istanbul ee caasimadda labaad ee dalka Turkiga halkaasoo si diiran loogu soo dhoweeyey.

5/30/2012 4:04 AM EST
Arbaco, May, 30, 2012 (HOL) — Sida ay inoo xaqiijiyeen saraakiil ka tirsan maamulka gobollka Hiiraan waxaa dib u dhac ku yimid ciidamado ka socday dowladda Jabuuti oo lagu waday in ay maanta gaaraan magaalada Beledweyne ee xarunta gobolka Hiiraan.

5/30/2012 2:38 AM EST
Arbaco, May 30, 2012 (HOL) — Dowladda Kenya ayaa sheegtay in maraakiibteeda dagaalka ay duqeeyeen magaalada Kismaayo ee xarunta gobolka Jubbada Hoose oo ay ka taliso Xarakada Al-shabaab.

5/30/2012 2:26 AM EST
Arbaco, May 30, 2012 (HOL) — Madaxweynaha iyo madaxweyne ku xigeenka ku xigeenka maamulka Galmudug ayaa isku khilaafay ka qaybgalka shirka Istabuul II ee looga hadlayo mustaqbalka Soomaaliya.

5/30/2012 2:12 AM EST
Arbaco, May 30, 2012 (HOL) — Xarakada Al-shabaab ayaa sheegtay in weerarkii gaadmada ahaa ee shalay ay ku qaadeen gaadiid uu la socday madaxweynaha oo marayay inta u dhexeysa Muqdisho iyo Afgooye ay ku doonayeen inay ku dilaan madaxweynaha Soomaaliya, Sheekh Shariif Sheekh Axmed.

5/30/2012 1:44 AM EST
Arbaco, May 30, 2012 (HOL) — Ugu yaraan sideed qof oo u badan ciidamada ammaanka Puntland ayaa ku dhintay qarax miino oo saakay ka dhacay xaafadda Garsoor ee Waqooyiga magaalada Gaalkacyo ee gobolka Mudug.