3/29/2024
Today from Hiiraan Online:  _
Wararka Maanta- Sabti, July 14, 2012
Madaxda DKMG Soomaaliya oo si Wadajir ah Odayaasha Dhaqanka uga dalbaday inay soo dedejiyaan xulista Ergooyinka
Sabti, July 14, 2012 (HOL) — Madaxweynaha Soomaaliya, Sheekh Shariif Sheekh Axmed, ra'iisul wasaaraha C/weli maxamed Cali iyo afhayeenka baarlamaanka Shariif Xasan Sheekh Aadan oo maanta si wadajir ah ula kulmay odayaasha dhaqanka ee ku shirsan Muqdisho ayaa ka codsaday inay soo dedejiyaan xulista ergooyinka.

Kulankan oo ka dhacay halka ay deggen yihiin odayaasha dhaqanka Soomaaliyeed ayaa waxaa goobjoog ka ahaa wasiirro xukuumadda KMG ah ka tirsan, waxayna madaxda dowladdu markii hore kulan la qaateen guddiga xallinta khilaafaadka ee ay odayaashu horay u sameysteen.

"Madaxda Soomaaliya waxaan u sheegaynaa inaan 75% soo diyaarinay ergooyinka ansixinta dastuurka, haddii ay sax yihiinna aan wada saxiixanno haddii ay khaladan yihiinna aan wada saxanno," ayay tiri Xaawo Siciid oo ku hadlaysay magaca guddiga xallinta khilaafaadka.

Intaas kaddib madaxda DKMG ah ayaa u sheegay odayaasha dhaqanka in looga baahan yahay inay soo gudbiyaan liiska 135-duub in lasoo gudbiyo si meesha ay uga baxdo wararka la isla dhexmarayo oo ah in odayaasha xareysan aysan ahayn kuwii runta ahaa ee beelaha Soomaaliyeed matalayay, ayna u billowdaan xulista ergooyinka ansixinta dastuurka iyo xulista xildhibaannada cusub ee Soomaaliya.

"In duubabkii Soomaaliyeed ay halkan isugu yimaadaan Ummadda Soomaaliyeed iyo dowladda KMG ah waxay u tahay sharaf, waxaana rajeynaynaa in howshiinna ay ku dhammaato guul," ayuu yiri Sheekh Shariif.

Madaxweynuhu wuxuu codsaday in la isku dhinac wado xulista ergooyinka ansixinta dastuurka iyo xidhibaannada baarlamaanka cusub ee dalka si loo dedejiyo howlaha u harsan dowladda KMG ah oo waqtigeedu ku eg-yahay 20-ka bisha Ogoosto 2012.

Guddoomiyaha baarlamaanka iyo ra'iisul wasaaraha ayaa iyaguna uga mahadceliyay odayaasha dhaqanka howsha ay ku jiraan, waxayna sheegeen in dowladda KMG ah ay ka go'an tahay in Soomaaliya laga saaro xilliga KMG ah ayna u gudubto dowlad joogto ah.

Ugu dambeyn, Madaxda dowladda waxay goobta ka sheegeen in shirka ansixinta dastuurka uu 21-ka bishan furamayo, iyagoo rajo wanaagsan ka muujiyay inuusan mar kale dib u dhac ku imaan.

Madaxweynaha Soomaaliya iyo wafdi uu hoggaaminayo ayaa kulanka kaddib waxay ka dhoofeen magaalada Muqdisho iyagoo kusii jeeda dalka Itoobiya oo uu berri ka furmayo shirka madaxda dalalka Qaaradda Afrika.

Maxamed Xaaji Xuseen, Hiiraan Online
[email protected]
Muqdisho, Soomaaliya











Click here
7/14/2012 9:29 AM EST
Sabti, July 14, 2012 (HOL)- Carwadda caalamiga ah ee Buugaagta ee Hargeysa oo sanad walba la dhigo ayaa lagu qabtay hoolka guriga shaqaalaha ee badhtamaha magaaladda Hargeysa, halkaas oo ay ka soo qaybgaleen boqolaal dadweyne oo xiisaynaya barnaamijyadda kala duwan ee ka socday hoolkaasi.

7/14/2012 8:54 AM EST
Sabti, July 14, 2012 (HOL) — Shir looga hadlayay xaqiijinta ammaanka goobaha lagu qabanayo shirka ansixinta dastuurka iyo xulidda xildhibaannada Soomaaliya ayaa maanta waxaa Muqdisho ku yeeshay mas'uuliyiin ka socday dowladda KMG ah, AMISOM iyo xubno matalayay Qaramada Midoobay.

7/14/2012 8:41 AM EST
Sabti, July 14, 2012 (HOL) — Hal qof ayaa ku dhintay bannaanbax cansho ah oo maanta ka dhacay degmada Dhuusomareeb ee xarunta gobolka Galguduud halkaas oo uu ka taliyo maamulka Ahlusunna Waljamaaca.

7/14/2012 7:37 AM EST
Sabti, July 14, 2012 (HOL) — Ciidamada AMISOM ayaa fariisin rasmi ah ka dhigtay xerada Laanta-buuro ee gobolka Shabeellada hoose oo maalmo ka hor ay dagaal uga qabsadeen Xarakada Al-shabaab.

7/14/2012 7:21 AM EST
Sabti, July 14, 2012 (HOL) — Iyadoo lagu wado in dhammaadka bishan uu ka furmo magaalada London ee dalka Britain ciyaaraha olombikada dunida ayaa Soomaaliya waxay nasiib u yeelatay inay ka qaybgasho ciyaarahan, waxayna sheegeen orod-yahannada ku ordaya magaca Soomaaliya inay natiijo wanaagsan kasoo hoyn doonaan ciyaarahaas.

7/14/2012 5:16 AM EST
Sabti, July 14, 2012 (HOL) — Munaasabad si heer sare ah loo soo agaasimaya oo ay soo qaban qaabiyeen maamulka, macalimiinta iyo ardayda wax ka barata Jaamacadda Hiiraan University ayaa lagu qabtay magaalada Baladweyne.

7/14/2012 5:13 AM EST
Sabti, July 14, 2012 (HOL) — Maamulka Xarakada Al-shabaab ee gobollada Jubbooyinka ayaa maanta meel fagaare ah ku gubay gaadiid si sharci-darro ah jaad kusoo geliyay magaalada Kismaayo ee xarunta gobolka Jubada hoose.

7/14/2012 3:31 AM EST
Sabti, July 14, 2012 (HOL) — Xukuumadda KMG ah ee Soomaaliya ayaa sheegtay in howgallo ay ciidamada dowladdu ka sameeyeen Muqdisho lagu soo qabqabtay dad badan oo xiriir la leh Xarakada Al-shabaab.

7/14/2012 3:23 AM EST
Sabti, July 14, 2012 (HOL) — Hay'adda sirdoonka Faransiiska ayaa sheegtay inuu weli nool yahay, Denis Allex oo ah sarkaal tababaray ciidamada Dowladda Somalia oo sannadkii 2009 ay isaga iyo sarkaal kale oo baxsaday ku afduubeen magaalada Muqdisho ee xarunta Soomaaliya.

7/14/2012 3:09 AM EST
Sabti, July 14, 2012 (HOL) — Hay'adda caafimaadka dunida ee WHO ayaa sheegtay inay walaac xooggan ka qabto inay kordhaan tirada dadka qaba cudurka daacuunka ee ku nool magaalada Kismaayo ee gobolka Jubbada Hoose oo ay gacanta ku hayso Xarakada Al-shabaab.

7/14/2012 2:53 AM EST
Sabti, July 14, 2012 (HOL) — Guddoomiyaha baarlamaanka Soomaaliya, Shariif Xasan Sheekh Aadan oo dib ugu soo laabtay dalka Jimcihii shalay ayaa sheegay in caasimadda Soomaaliya ee Muqdisho aysan ahayn wax gorgortan geli kara, sidoo kale wuxuu ku baaqay in la taageero hannaanka looga baxayo xiolliga KMG ah.