1/27/2022
Today from Hiiraan Online:  _
Wararka Maanta- Sabti, Jun 9 , 2012
MAXAMED DHEERE: "Ururka Al-shabaab waa boog ay Dadka Soomaaliyeed iska goyn wayeen ciddii goynaysana waan soo dhaweyneynaa"

Sabti, June 09, 2012 (HOL) — Maxamed Cumar Xabeeb (Maxamed Dheere) oo soo qabtay xilka guddoomiyaha gobolka Banaadir iyo duqa Muqdisho ayaa lacagihii la dul-dhigay saraakiisha Al-shabaab ku sheegay inuu soo dhaweynayo; isagoo ku tilmaamay mid guul u ah Soomaaliya iyo calaamka oo dhan.

Maxamed Dheere ayaa sheegay inay gacan siinayaan cid walba oo la dagaalamaysa Al-shabaab, wuxuuna xusay inay Mareykanka kaga mahadcelinayaan go'aanka uu lacagaha ku dul-dhigay toddoba ka mid ah hoggaamiyeyaasha Al-shabaab.

"Al-shabaab iyo ragga lacagaha la dul-dhigay waxay ahaayeen boog ay Soomalai iska goyn wayday, cidii ka goynaysana waan soo dhaweyneynaa," ayuu Maxamed Dheere ku sheegay war uu saxaafadda siiyay.

Xukuumadda Washington ayaa waxay maalin ka hor dul-dhigtay 33-milyan oo dollar oo abaalmarin ah ciddii soo sheegta halka ay ku sugan yihiin toddoba hoggaamiye oo ka tirsan Al-shabaab, kuwaasoo uu ku jiro hoggaamiyaha guud ee kooxdan.

Guddoomiyihii hore ee gobolka Banaadir hore wuxuu ku taliyay in hoggaamiyeyaasha Al-shabaab ee la dul-dhigay lacagaha laga qaado tallaabadii laga qaaday Saalax-Nebhaan oo kale, taasoo uu sheegay inay gacan ka geysan karto in Al-shabaab laga cirib-tiro dalka oo dhan.

"Sababta lacagaha loo dul-dhigi waayay, Sheekh Xasan Daahir Aweys iyo Sheekh Cali Dheere oo ka mid ah saraakiisha Al-shabaab waa inay iyagu soo sheegaan halka ay ku sugan yihiin ragga la raadinayo; iyagana lama dhaafi doono," ayuu yiri Maxamed Dheere.

Dhanka kale, dhaqaalaha lacageed ee la dul-dhigay hoggaamiyeyaasha Al-shabaab ayaa waxaa soo dhaweysay dowladda KMG ah, iyadoo ku sheegtay inay tahay mid soo afjari karta jiritaanka Xarakada Al-shabaab.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
6/9/2012 8:00 AM EST
Sabti, June 09, 2012 (HOL) — Wasiir ku xigeenka wasaaradda gaadiidka cirka, dhulka iyo dekedaha dowladda KMG ah ee Soomaaliya, Cabdiraxmaan Kulmiye Xirsi (C/raxmaan Dheere) ayaa sheegay in muddo kooban lagu xiray magaalada Berbera ee Somaliland ayna si xun ula dhaqmeen maamulka garoonka diyaaradaha iyo ciidamadii xiray.

6/9/2012 7:53 AM EST
Sabti, June 09, 2012 (HOL) — Magaalada Beledweyne ee xarunta gobolka Hiiraan ayaa waxaa bilihii ugu dambeeyayba ka jiray ugu yaraan isku-day ay doonayaan hay’addaha samafalka ee ka howlgala Beledweyne in ay ku caawiyaan dadka jilicsan gaar ahaan caruurta iyo haweenka aan mudada dheer helin gargaarkii ay u baahnaayeen.

6/9/2012 6:58 AM EST
Sabti, June 09, 2012 (HOL) — Ciidammo Itoobiyaan ah oo wata gaadiid dagaal oo fara badan ayaa maanta soo buuxiyay degmada Luuq ee gobolka Gedo, halkaas oo ay gacanta ku hayaan ciidamada dowladda Soomaaliya.

6/9/2012 6:38 AM EST
Sabti, June 09, 2012 (HOL) — Kulankan oo lagu taageerayey shirkii dhawaan lagu qabtay dalka Turkiga ee looga arinsanayey aayaha Soomaaliya, ayaa waxaa ka soo qeybgalay kala dad kala duwan oo isugu jira aqoon-yahano, siyaasin, cuqaal iyo waliba qeybaha ee bulshada Soomaalida ah ee ku dhaqan gobolka Minnesota.

6/9/2012 6:35 AM EST
Sabti, June 09, 2012 (HOL) — Iska-horimaadkan ayaa yimid kaddib markii xoogag ka tirsan Al-shabaab ay saaka weerareen fariisimo ay ciidamada dowladda KMG, kuwa Raaskaambooni iyo ciidamada Kenya ay ku lahaayeen duleedka degmada Afmadow ee gobolka Jubbada Hoose.

6/9/2012 3:55 AM EST
Sabti, June 09, 2012 (HOL) — Afhayeenka dagaalyahannada taageersan DKMG ah ee Raaskambooni, Cabdinaasir Seeraar Maax ayaa sheegay in xoogaggooda oo gacan ka helaya ciidamada dowladda KMG ah iyo kuwa Kenya oo ka tirsan AMISOM ay ku dhow yihiin magaalada Kismaayo ee xarunta gobolka Jubbada hoose.

6/9/2012 3:34 AM EST
Sabti, June 09, 2012 (HOL) — Xaaladda caafimaad ee wariye Maxamed Shariif oo ka mid ah wariyeyaasha u shaqeeya idaacadda Bar-Kulan oo xalay lagu dhaawacay Muqdisho ayaa soo wanaagsaneysa.

6/9/2012 3:19 AM EST
Sabti, June 09, 2012 (HOL) — Sheekh Fu'aad Maxamed Khalaf (Shan-gole) oo ka mid ahaa toddoba xubnood oo hoggaanka Al-shabaab ka tirsan ee Mareykanku uu sheegay inuu malaayiin dollar ku bixinayo xogtooda ayaa hadlalkaas ka jawaabay, isagoo sheegay in iyaguna ay xoolo nool ku bixniayaan xogta ku saabsan madaxda Mareykanka.