Miino dhulka lagu aasay oo la Qaraxday ciidan ka tirsan Puntland iyo ganacsade lagu dilay Gaalkacyo
Khamiis, September 01, 2016 (HOL) —Qarax sababay khasaare isugu jira dhimasho iyo
dhaawac ayaa lagu soo waramayaa in lala eegtay ciidamo ka tirsan kuwa Puntland
oo ku sii jeeday degmada Gal-gala ee gobolka Bari ,halkaasi oo ay ku dhumaalaysanayaan
xubno ka tirsan ururka Al-shabaab ee dagaalka kula jira Puntland.
Tiro askar ah ayaa lagu soo waramayaa in ay qaraxan ku
dhaawacmeen,kaasi oo ka dhacay halka lagu magacaabo Bali-khadar oo ka tirsan
Gal-gala ,isla markaana uu dhowr jeer oo hore dagaal ka fool ka fool ah ku
dhex-maray Al-shabaab iyo Puntland.
Mas’uuliyiin ka tirsan dowladda Puntland oo aan la
xiriirnay ayaa ka gaabsaday in ay faah-faahin ka bixiyaan weerarkan oo dadka ku
geeriyooday ay ku jirto qof dumar
sida laga soo xigtay dad deegaanka ah.
Dhinaca kale maleeshiyaad hubaysan ayaa maanta
magaalada Gaalkacyo ku dilay nin ganacsade ah oo lagu magacaabi jiray
Cabdulaahi Cismaan Axmed xilli uu marayay suuqa Darxumo ee waqooyiga magaalada
Gaalkacyo.
Weerarkan oo u muuqday mid qorshaysan ayaa la
sheegay in kooxihii fuliyay ay u baxsadeen dhanka koonfurta magaalada Gaalkacyo
waxyar ka dib intii aysan Puntland xayiraad ku soo rogin gaadiidka badeecdaha u
soo sida Puntland ee ka imaanaya koonfurta iyo bartamaha Soomaaliya.
Ugu danbayn, Puntland ayaa ciidamo tiro badan
keentay magaalada si loo sugo amniga ,waxaana maalmo ka hor ay soo saartay
liiska dhowr nin oo lala xiriirinayo qaraxii dhimashada badan sababay ee asbuucii hore ka
dhacay magaalada Gaalkacyo.
Hiiraan Online News Desk